Hilutongan ngadto sa Tambuli languyon ni Justine

Langoyon karong adlawa ni Justine Gunio ang 6 -anyos nga batang lalaki ang 20 kilometros kapin nga gilay-on gikan sa isla sa Hilutongan ngadto sa Tambuli Beach Resort sa  Maribago dakbayan sa Lapulapu.

Base sa pamahayag ni Rudy Villanobos, ang director sa Tourism Commission sa dakbayan sa Lapulapu nga karong adlawa pagahimuon ang paglangoy ni Gunio diin usa kini sa pagbansaybansay sa bata sa umaabot niini nga planong paglangoy didto sa Estados Unidos sa dili pa matapos ang tuig o sa unang quarter sa tuig 2008.

Gipasabot ni Villanobos nga ang kagamhanang lokal sa dakbayan sa Sugbu miabag lamang sa maong bata sa iyang tinguha nga makab-ot ang world record nga gihuptan ni Brackston Belgre, usa ka 7 anyos nga batang lalaki nga maoy milangoy gikan sa San Francisco California bay ngadto sa Alcatras sa Estados Unidos nga adunay gilay-on nga 2.8 milya.

Matud pa ni Col. Elpidio Gunio,  amahan ni Justine, gumikan sa kakulangan sa financial nga aspeto maoy hinungdan nga wala mahinayon ang paglangoy ni Justine didto sa California ug posibleng sa dili pa matapos ning tuiga o sa sunod tuig malangoy na ni Justine ang San Francisco Bay ngadto sa Alcatras samtang 6 anyos pa ang iyang anak.

Samtang andam na usab ang mga sakop sa Philippine Coast Guard, Philippine Navy, Phil. Air Force, ERUF ug sea ambulance nga iya sa kagamhanang lokal sa dakbayan sa Lapulapu nga maoy magsilbing escort ug magmonitor ni Justine sa iyang paglangoy.

Matud pa ni Col. Gunio, ang DSWD wala mobabag sa tinguha ni Justine ug sa mga ginikanan niini sa ilang lakang sa paglangoy ug pagkuha sa world record didto sa Estados Unidos basta dili kini magpabayad, aron dili kini maakusahan nga migamit sa bata sa pagpangwarta ug pagpahimulos sa iyang talento bugti sa salapi.

Matud pa ni Col. Gunio nga ang paglangoy sa iyang anak usa usab kini ka halad ngadto sa Birhen sa Regla nga maoy mahal nga patron sa dakbayan sa Lapulapu sa umaabot niini nga kapistahan niining buwana.

Pagasugdan mga alas 6 sa buntag karong adlawa ang paglangoy ni Justine  gikan sa isla sa Hilutongan ngadto na sa  Maribago mainland sa dakbayan sa Lapulapu diin adunay gilay-on nga 20 kilometros.