Gihagit karon ni Bise Mayor Michael Rama ang kadagkoan sa kapolisan sa dakbayan nga ilhon ang tapulan nga mga pulis sa siyudad.
Kini human usab ibutyag ni PNP Director General Avelino Razon Jr., nga daghang mga polis sa nasud ang mga tapulan.
Ang bise mayor nga maoy chairman sa Police Coordinating and Advisory Council (PCAC) niingon nga dili makorihean ang pagkatapulan sa polis kun dili sila mailhan.
Labaw sa tanan miingon si Rama nga dili makorihian ang pulis nga tapulan kung dili mamahimnong ehemplo o modelo ang mga labaw niini.
“Kanang problemaha dili na makorihean kung dili ma-identify ang hingtungdang mga polis ug dili sab na makorihian kung dili mo-set og example ang ilang mga leader,” sumala pa ni Rama.
Gipasabot ni Rama nga kung tapulan ang mga opisyal sa kapulisan dili kahibugngan nga mosunod usab niini ang ilang mga sakop.
Giklaro sa bise mayor nga ang tapulang mga pulis dunay tulubagon sa ilang katungdanan nga mahimong muresulta sa pagkatangtang sa trabaho.
Gihimong sanglitanan ni Rama niini mao ang upat ka mga pulis nga gidistino sa Ludo Cemetery sa niaging kalag-kalag nga mibiya sa ilang puwesto.
Ang nahisgutang mga pulis nga giingong na-assign sa Waterfront Police Station 3, gipaubos na hinuon sa imbestigasyon.