Wala mosakay sa isyu si Lapulapu City Police Chief, Supt. Louie Oppus sa lakang ni magpapatigayon Efrain Pelaez nga siya pahulipan sa pwesto.
Sa dihang gipangutana sa Banat News si Oppus may kalambigitan sa maong isyu gidedma lamang kini ni Oppus ug gani wala siya mokomentaryo kalabot sa isyu.
Hinuon sa miaging mga isyu ni Oppus nga siya pagahulipan sa iyang pwesto isip hepe sa kapolisan sa dakbayan sa Lapulapu igo lamang kini mikatawa ug mipadayag nga siya usa ka maayong sundalo nga motuman gyud sa mando sa iyang labaw.
Gani sa dihang nagsingabot ang piniliay niadtong Mayo 14 siya gilabay sa 1st district sa lalawigan sa Sugbu nga walay nabati nga reklamo sa maong kamanduan hangtod nga kini nakabalik sa dihang midaog pag-usab si Lapulapu City Mayor Arturo Radaza uban sa mando usab sa iyang labaw sa PNP Regional Office nga si Chief Supt. Silverio Alarcio Jr.
Sa nasayran nga si Oppus gilakip paggukod ni Pelaez gumikan sa nahitabong pagpatak-op sa Marina Mall sa milabay’ng buwan nga ang iyang mga sakop sa kapolisan usa sa gigamit nga puwersa sa city government atol sa implementasyon sa maong mando.
Gumikan niini si Pelaez gikatahong mihangyo ngadto sa labaw sa PNP sa kampo Crame nga pahulipan si Supt. Oppus sa iyang posisyon.