Media isip brgy officials di ok-Abad

Dakong supak ang tsirman sa Kapisanan ng mga Brodkaster sa Pilipinas (KBP-Cebu chapter) Edward Abad sa pag-apil-apil sa mga sakop sa media sa bag-o lang natapos nga barangay ug SK election nga gipahigayon niadtong Oktubre  29.

Gibutyag ni Abad dihang nahinabi sa Bantay Radyo nga walay opisyal nga posisyon ang KBP kabahin niini tungod kay mirespeto man kini sa tagsatagsa ka palisiya nga gipatuman sa matag estasyonan sa radyo ug telebisyon.

Apan alang sa iyang personal nga opinyon dili makaayo sa organisasyon sa panibya nga ang mga sakop sa media moapil sa pagpapili og posisyon sa barangay ug bisan unsang “elected position” sa gobiyerno tungod kay salikwa-ot kining paminawon.

“Kitang mga sakop sa media nagsilbing watchdog sa gobyerno, magbantay sa mga anomaliya ug bakikaw nga tan-awon nga ang nagbantay nasakop na hinuon didto,” dugang asoy ni Abad.

Gi-discourage ni Abad ang mga sakop sa media pagsalmot sa mga eleksyon nga ipahigayon ug kun interesado kini nga mosalmot gikinahanglan nga modesisyon kini kun unsay iyang palabihon ug pili-on, “you cannot serve two masters at the same time,”dugang asoy ni Abad.

Subling gipahinumdom ni Abad nga kitang mga sakop sa media angay nga ipatigbabaw ang “ethical standard”  aron usab mapanalipdan ang interes sa media outlet niining gitrabahoan.

Nasayran nga dunay daghang mga sakop sa media nga midaog sa bag-o lang natapos nga piniliay sa barangay ug SK nga gilangkoban nila ni Ramil Ayuman sa ABS-CBN pagka kapitan sa Apas, Dave Tumulak sa DyAB kapitan sa Basak-Pardo, Eliodoro Sanchez sa Bantay Radyo nga  kapitan sa Busay, Malou Tabar sa DyHP  nga kapitan sa Banilad, Allan Majait sa DySS  nga konsehal sa Apas, Jojo Solante DySS nga kapitan sa barangay sa Tudela, Camotes ug Jonathan Tumulak sa DyRF  sa Lawaan Talisay.

Gawas nila duna say mga sakop sa print media ang midaug sama ni Garry Lao sa The Freeman ug Banat News nga pagka konsehal sa Tejero ug Joseph Tubilan sa Superbalita pagka konsehal sa Poblacion, Barili.