Mi-plead not guilty ang broadcaster ug kanhi anchorman sa tulumanon nga “Birada” sa DYHP-RMN Cebu nga si Joash Dignos atol sa arraignment sa iyang pito ka libel cases nga giatubang sa sala ni RTC branch 55 Judge Ulrich Cañete kagahapong adlawa.
Nagdumili hinuon si Dignos pagkomentaryo kung duna bay igong kapasikaran ang gipasakang kaso batok kaniya.
“I would be bias if I say nga huyang ang kaso nga ilang gipasaka, dili na lang ko ana mokomentaryo kay naa man na sa korte,”suma pa ni Dignos.
Matud ni Dignos nga iya na lang atubangon ang nahisgutang mga kaso uban sa pasalig pagtunga sa gitakdang mga husay.
Nasayran gikan kang Dignos nga ang pre-trial sa libel cases nga iyang giatubang gitakda karong Disyembre 17.
Pabiling gibarugan ni Dignos nga walay malisya ang iyang giluwatang mga pamahayag ug komentaryo sa kahanginan.
Ang komentarista gipasakaan og mga kasong libelo ni kanhi Mandaue City Mayor Teddy Ouano ug sa iyang umagad nga si Cheryl Ouano.
Kini tungod sa giingong paggamit niini sa pulong nga jerjer sa kahanginan samtang naghisgot sa mga reklamante.
Onse ka libel cases ang gipasaka nila ni Teddy ug Cheryl Ouano batok kang Dignos, taliwa sa nagbaga nga mga komentaryo niini.
Apan nasayran hinuon sa Banat News nga gibasura sa giumol nga panel of prosecutors ang upat ka counts niini .
Kini tungod kay wa makakita og igong basihanan ang piskaliya pagpasaka sa maong mga kaso ngadto sa hukmanan.