Batan-on gipusil sa paryente ni Waway

Grabeng naangol ang usa ka batan-ong lalaki dihang kalit lang gipusil sa laing batan-on nga gikatahong paryente sa wanted nga si Warlito Toledo alyas Waway.

Ang pagpamusil nahitabo sa miaging gabii sa barangay Looc, dakbayan sa Danao.

Si SP04 Teofilo Deguilmo miila sa biktima mao si Christian Baton, 20 anyos nga taga Pulang Bukid, Looc sa maong dakbayan.

Giila usab niya ang suspetsado nga mao ang usa ka Tonton Toledo nga nagpuyo usab sa maong dapit.

Matud pa ni SP04 Deguilmo nga naglakaw ang biktima pauli sa ilang panimalay sa maong dapit kuyog sa higala nga mga batan-ong babaye.

Nagtuo si Deguilmo nga walay igong hinungdan ang maong pagpamusil nga ilang nakita gawas lang nga gikasuyaan kini sa suspetsado sanglit suod man kini sa mga babaye sa ilang dapit.

Si Waway mao kadtong gikaintapan sa mga silingang siyudad sa Danao tungod sa report nga manuktok kini sa kabalayan aron manglugos ug mopatay.