45 insular prisoners dad-on sa Munti

Laing mga insular prisoner diha sa bag-ong Cebu City Jail sa barangay Kalunasan ning dakbayan ang ipadala ngadto sa Muntinlupa.

Kini maoy gipahibawo sa jail warden sa nahisgutang bilangguan nga si Supt.  Efren Nemenio.

Matud ni Nemenio nga 45 ka konbiktadong mga binilanggo nga dunay sentinsya nga dili mominos sa unom ka tuig ang ilang ipadala ngadto sa kauluhan.

Gipadayag sa jailwarden nga ang nahisgutang lakang maoy kabahin sa ilang programa pagpaluag sa city jail.

“Ato gyong gitinguha nga dili magsugwak ang atong mga binilanggo, mao nga atong ipadala dayon sa Muntinlupa ang mga insular prisoner”sumala pa ni Nemenio.

Wala  pa hinuon matino sa jailwarden kung kanus-a mapadala ang 45 ka binilanggo ngadto sa kauluhan.

Kini tungod kay wala pay tubag ang Bureau of Jail Management and Penology (BJMP-7)  sa ilang suwat-hangyo.

Apan malaumon si Nemenio nga makalarga ang mga piniriso ngadto sa Muntinlupa sulod niining buwana.

Miingon si Nemenio nga gikinahanglan ang pagtugot sa BJMP tungod kay kini maoy mopagawas og pundo nga gamiton pagbiyahe sa mga inmates.

Sa pikas bahin, nagplano usab ang jail warden nga mangayo na usab og financial assistance sa kagamhanan sa dakbayan alang sa travel expenses sa ubang binilanggo.

Kini tungod kay gawas sa 45 ka piniriso nga ilang ipadala ngadto sa Muntinlupa, duna pay laing mga insular prisoner nga mahabilin.

Nasayran sa Banat News nga 45 usab ka insular prisoner diha sa City Jail ang napadala ngadto sa kauluhan sa wala pa ang kalag-kalag.

Ang City Jail sa kasamtangan  dunay kapin sa 2,300 ka mga binilanggo, diin ang labing tiguwang niini nag-edad ug 72 anyos nga nag-atubang og kasong pagpatay.