De makinang sakyanan idili sa Malapascua

Dili na pabiyaheon sunod tuig ang mga de makina nga sakyanan sulod sa isla sa Malapascua sa lungsod sa Daanbantayan nga usa ka destinasyon sa mga turista.

Kini ang kamandoan nga giluwatan ni Gob. Gwendolyn Garcia kinsa mao usab ang pangulo sa Malapascua Island Eco-Tourism Development Plan Task Force nga maoy naghan-ay sa mga programa sa pagpalambo sa tibouk isla.

Ang pagdili sa mga de makinang sakyanan sama sa motorsiklo sa pagbiyahe sa isla sa Malapascua ang tipik lang sa mga plano aron pagpreserbar sa kinaiyahan.

Sa pagkakaron, mga motorsiklo lang nga gitawag og habal-habal ang nagbiyahan sa isla sa Malapascua ingon man isip pribadong sakyanan sa mga tawo.

Nalatid sa plano nga mga biseklita lang ang magdagan nga sakyanan sa isla ug mahimo kining trisikad kon pamasaheroan palibot sa isla.

Nunot niini gimandoan ni Garcia si Mayor Sun Shimura sa pag-implementar na sa maong palisiya.

Usa sa himoon mao nga did-an na si bisan kinsa nga mokarga og motorsiklo luwan sa mga pumpboat padulong sa isla.

Samtang kadtong nakapalit na og motorsiklo, dili na sila hatagan og permit ingon man clearance sa higayun nga ila kining kinahanglanon sa pagbag-o sa ilang lisensiya ug rehistro.

Sa pagkakaron, gipahibawo na ang katawhan sa isla sa Malapascua labot sa maong palisiya aron dili na sila mahinayak pa og palit og motorsiklo.