2 ka minor nadakpan kay nanulis

Duha ka menor de edad nga gidudahang tulisan ang nasikop sa kapolisan pipila ka oras human nila tulisa ang duha lalaking misuway sukol kanila diha sa dalan Mac Arthur Blvd. sa barangay Carreta kagahapon sa kaadlawon.

Ang nadakpan nga nag-edad og 16 anyos nga taga sitio Ponce, sa barangay Carreta ug 14 anyos nga taga sitio Escano sa Silangan 2, barangay Tejero atol sa follow-up operation sa Waterfront Police Station.

Ang mga biktima giilang sila si Neil Duarte, 28, taga dala Gil Tudtud sa Mabolo ug Bernard Villorejo kinsa naatol nga diha sa pagkahitabo ug mitabang kang Duarte sa pakigsinukmagay sa mga suspek.

Sa imbestigasyon sa kapolisan sa Waterfront Police, kasamtangang naglakaw ang duha diha sa maong dapit dihang nakit-an nila ang pundok sa mga batan-ong kalit lang mipaduol kanila ug misinggit og ‘Hold-up ni ha! Way dagan!”

Gituuhang tungod kay mga batan-on ra ang mga suspek, gisuklan sa mga biktima ang grupo nga miresulta sa karambola apan diha nalang sila mohunong dihang pulos na mibunot og icepick ug kutsilyo ang mga suspek.

Wala nay nahimo si Duarte dihang gikuha sa usa sa mga suspek ang iyang relo de pulso nga nagkantidad og P1,600; T-230 Sony Ericson nga cellphone nga nagkantidad og P4,000 ug cash nga P2,000.

Daling nangikyas palayo ang mga suspek hinungdan nga midangop ang mga biktima sa Waterfront Police Station. Sila si SPO2 Rene Cerna, PO2 Witzel Berry ug PO1 Ramil Tanggol mao nay nakasikop sa duha samtang ang laing kaubanan nila padayon pang gawasnon.

Walay bisan usa sa kabtangan ni Duarte ang narekober bisan paman sa pagkasikop sa duha ka batan-on.