Pilar victims gitabangan

Ang kagamhanan sa lalawigan sa Cebu may giandam nga hinabang alang sa pamilyang nagbangutan sa mga nabiktima sa trahedya sa kadagatan sa isla sa Camotes niadtong Miyerkules sa hapon.

Si Gobernador Gwendolyn  Garcia miingon nga ang maong mga hinabang naglakip sa pagkaon ug salapi alang sa pamilya sa tulo nga nangamatay ug duha nga “missing” sa pagkalunod sa bangkang de motor, ang M/B Anton II didto sa kadagatan sa barangay Kawit, lungsod sa Pilar , isla sa Camotes alas 5:30 sa hapon niadtong Miyerkules.

Apan matud pa sa gobernador nga unang ikahatag sa iyang buhatan ang bugas, sardinas, noodles ug uban pang hinabang, tungod kay paabuton pang molibkas ang “Comelec ban” sa pagpagawas og salapi alang sa mga proyekto sulod sa election period.

Ang maong mga hinabang adto ihatag sa pamilya nila ni Liza Cabillo Godinez kinsa namatay, samtang missing usab ang iyang 10 anyos nga anak nga si Warly Godinez Jr., pamilya ni Edgar dela Cruz nga missing, samtang  namatay usab ang iyang 10 ka buwan nga anak nga si Edcel, ug sa pamilya sa ikatulong namatay nga si Eleonor Umolon Tecling.

  Ang kagamhanan sa lalawigan may gigahing hinabang  agi’g limos nga dili mominus tag P5,000 alang sa matag pamilya sa matag usa ka kinabuhing makalas gumikan sa mga katalagman.

Gawas niini gipasusi usab sa gobernador ang tinuod nga hinungdan sa maong hitabo aron pagsuta kun may angayan bang manubag niini sa hukmanan.

Kini samtang padayon pang gisuhid sa mga otoridad sa Philippine Coast Guard ang kadagatan sa amihanang bahin sa lalawigan sa Sugbu sa pagtuo nga gumikan sa hangin nga amihan may posibilidad nga tua ibanlas sa sulog sa dagat ang maong mga biktima.

Ang kapolisan sa mga kalungsoran sa San Remegio, Tabuelan ug Tuburan gipabantay na usab niini aron nga ikataho dayon nila ngadto sa kapolisan sa Camotes sa panahong may masigpatan silang mga  patay’ng lawas nga biktima sa ilang kadagatan.

 Gikalipay usab sa gobernador ang gipahayag sa tag-iya sa sakyanang nalunod nga si Konsehal Antonieto Federicos sa lungsod sa Pilar, nga mohatag og hinabang ngadto sa pamilya ilabi na sa pagpalubong sa mga biktima.

Ang M/B Anton II mibiya sa pantalan sa Danao City sa ala l:30 sa hapon nianang Miyerkules, ug sa paghiabot niini sa haduol na sa baybayon sa barangay Kawit,Pilar sa pagka alas 5:30 sa hapon, gihulog na ang angkla niini sa dagat aron  sa pagpakanaog sa iyang mga pasahero.

Apan kalit lang mihuros ang unos ug gumikan sa kadagko sa bawod, naputol ang pisi sa angkla hinungdan nga naanod ngadto sa lawom nga bahin sa dagat ang sakyanan.

Nawad-an sa maayong panimbang, nagtuyoktuyok nalang ang sakyanan sa dagat hinungdan nga dali kaayo kining misaliring hangtod nga natikyaob dihang gidabodabohan  sa dagkong mga bawod.