Masoy, Glenn ikaparang ni Joy O. sa ABC election

Higpit nga ikaatbang alang sa pagpasubli isip Association Barangay Federation President ni Opao Barangay Kapitan Joveta Tuela Joy Ouano ang duha ka barangay kapitan nga kaalyado ni Mayor Jonas Cortes.

Ang duha nga mahimo niyang higpit nga ikaatbang mao si re-elected Labogon barangay kapitan Damaso “Masoy” Tumulak ug Banilad barangay captain elect Glenn Bercede sa barangay Banilad.

Si incumbent ABC Federation President Ouano maoy igsuon ni kanhi Mayor Thadeo Ouano kinsa taud-taod na nga naglingkod sa puwesto ang nasublian sa lain niyang termino isip kapitan sa Opao.

Si Tumulak nga oposisyon sa kanhi administrasyon  ni  kanhi Mayor Ouano ang gitan-aw karon sa mga kaalyado ni Cortes  nga haum isip ABC federation president.

Gradwado kini sa abogasiya ug kanhi kauban nga oposisyon ni Majority Floor Leader Victor Biano sa wala pa usab siya motapon sa Power Team ni kanhi Mayor Ouano.

Samtang  sakop usab sa Power Team ni kanhi Mayor Ouano si Bercede dihang konsehal pa kini sulod sa tulo ka termino apan mibulag uban sa laing sakop sa Power Team nga si Mayor Cortes sa Mayo 14 election.

Sa miaging barangay eleksiyon maoy midaug ang mayoriya nga barangay kapitan nga kaalyado sa mayor sa dakbayan nga makahatag og dakong kahigayonan sa pagkuha sa puwesto isip ABC federation president.

Sila si Bercede ug Tumulak kinsa pulos kaalyado karon sa administrasyon maoy lig-ong ikasakbang ni ABC Federation  President Ouano sa iyang pagpasubli kun ang duha magtinguha usab sa paghupot sa maong katungdanan.