Nagtingkagol diha sa Talisay detention cell ang usa ka 23-anyos nga lalaki human kini masikop sa mga tanod tungod sa iyang pagkulata sa iyang 52-anyos nga iyaan niadtong Huwebes sa hapon diha sa Barangay Upper Mohon, dakbayan sa Talisay.
Ang suspetsado mao si Roberto Natuto, ulitawo ug residente sa maong lugar.
Ang biktima mao si Victoria Parba kinsa daling mitaho sa mga tanod sa maong hitabo.
Base sa imbestigasyon sa kapolisan nga si Natuto nabatian ni Parba nga mitungo sa iyang 82-anyos nga apohan nga nagkanayon “buhi pa diay ka?, wa pa diay ka mamatay?, naghikog pa ka!, mamatay pa lang mo!”.
Misulod si Parba sa balay ug gipangutana niini si Natuto nganong gitungo ang iyang apohan apan ang suspetsado nasuko ug gisukmag si Parba sa dughan.
Wala pa makontento si Natuto mikuha kini og dos por dos nga kahoy ug gihapos ngadto sa iyang iyaan apan suwerte kay nakalikay ang biktima ug mikamang kini paingon sa gawas sa balay ug nanawag nila ni Dioscoro Canillo, Antonio Rodrigo ug Rogelio Cantoga nga mga tanod sa maong barangay.
Si Natuto nasikop sa maong mga tanod ug gitugyan ngadto sa kapolisan.