Ang retiradong koronel sa kapolisan nga gipasanginlang nanghasi sulod sa resto bar mihimakak sa nanggawas nga balita ug mipasangil nga “gituis” ang tinuoray nga nahitabo niadtong Oktubre 28 sa kaadlawon.
Sa gipadangat nga statement dinhi sa Banat News, si Retired Col. Rico Palcuto nagkanayon nga sila maoy reklamante sa insidente ug dili ang organizers sa maong kalihukan sa maong bar.
Niadtong alas 2:15 sa kaadlawon midangop ang iyang amahan sa Mabolo police station tungod sa reklamong banha kaayo ang bar diha sa ilang atbang ug diha kini gihimo sa dalan ug gipaatubang kanila ang dagkong upat ka loud speakers.
Ang gireklamo ni Palcuto mao si Dodi Conejero ug mga kaubanan kinsa maoy tagdumala sa 101.9 FM nga maoy mipasiugda sa launching sa usa ka bag-ong promotions sa MTV Philippines diha sa usa ka bar sa IT Park sa barangay Apas.
Sumala pa sa reklamo dunay 40 ka mga gwardiya sa maong kalihukan apan walay nakabadlong kanila kini bisan personal nang giadto ni Ret.Col. Palcuto ang maong bar aron pakigkitaan ang manager niini.
Apan gikatahong wala gyuy nipakita kaniya ni bisan usa sa mga organizers ug gihimakak usab sa mga Palcuto nga nagdala og armas ang retiradong opisyal niadtong tungura, gani mibalik nalang kini sa ilaha ug katulog apan wala kini makatulog tungod sa kabanha sa music.
Sa ikaduhang higayon mibalik ang retiradong opisyal ug gipangita gihapon ang manager sa maong restobar apan wala gihapoy mipakita kaniya lakip na si Conejero.
Gihimakak usab nilang hubog ang iyang amahan tungod kay gidid-an na kini pag-inom tungod kay makadaut kini sa iyang panglawas ug tuyo lang gyud niini pag-adto sa maong dapit aron pahinayan ang volume sa maong kalihukan.
Ang anak nga Palcuto mikwestyon nganong nakahimo niini og susamang kalihukan nga banha kaayo ang mga organizers nga gidili man sa city ordinance ang pagsaba-saba sa kadalanan ilabi na panahon sa kagabhion.
Sa migawas nga balita, gikatahong gisulong ni Palcuto ang maong restobar ug nanghasi didto ug nanion usab og armas, apan wala na kini maabti sa kapolisan dihang miresponde.
Gisuwayan og kuha sa Banat News ang habig sa maong bar apan pakyas ang maong tinguha.
Samtang padayon pa gihapon ang imbestigasyon sa maong insidente human mimando si PRO-7 director Ronald Roderos sa Cebu City Police Office nga imbestigahon ang reklamo.