Sunog sa Tejero, 7 ka balay  nasunog

Pito ka balay ang nangaugdaw sa nahitabong sunog diha sa sitio Sampaguita sa barangay Tejero kagahapon sa udto atol sa pagpunsisok sa mga tawo diha sa mga sam-ang sa dakbayan.

Si SFO1 Virgilio Niñal sa pakighinabi sa Banat News nagkanayon nga milanat lang og singko minutos nakontrolar dayon ang sunog apan midanyos kini og P140,000 nga kabtangan ug panimalay.

Ang sunog gialarma alas 11:54 ug daling giisa sa second alarm gumikan kay kasagaran sa kabalayan sa maong dapit ginama sa light materials ug init usab kaayo ang panahon kagahapon.

Matud pang Niñal ang sunog nagsugod sa panimalay ni Juliet Dequitos apan wala pa matino ang hinungdan niini sanglit kasamtangan pang gi-imbestigaran sa kabomberohan ang fire scene.

Wala hinuoy natalang nasakitan o ba kaha naangol sa maong insidente.

Daan ng mipasidaan si Cebu City Fire Marshal Ismael Codilla sa publiko nga magbantay sa mga kandilang ilang ibutang sa mga altar lakip na ang mga appliances nga gibiyaang gisaksak sa mga outlets tungod kay sagad nga kini maoy hinungdan sa sunog.