"Vote buying" sa SK nakabalaka

Gibutyag ni Castillano nga duna silay daghang mga sumbong nga nadawat kabahin sa “vote buying” apan ang mga nanawag magpaila lang nga concerned citizen.

Kini maoy gitug-an ni Atty. Lionel Marco Castillano kinsa dinapit sa Talakayan  Sa Isyung Polis  nga  gipasiugdahan sa Public Information Office kagahapon nagkanayon nga daghan silang nakat-unan sa maong piniliay ug nakapaalarma.

Usa sa nakapaalarma niini mao nga ang nalambigit mao ang mga kandidato sa Sangguniang Kabataan nga namayad pa og tag P3 mil matag botos.  

“Reports lang ang akong nadawat, mao nay akong hangyo unta nila nga kung mahimo mo-file gyud og formal complaints kaysa itawag lang sa teleponong moingon lang og concern citizens, unya og among respondehan pag-adto didto naa man sa sulod sa private place,” asoy pang Castillano.

Matud pa niya nga kung ilang pugson og sulod ang maong dapit ang Comelec ug ang kapolisan maoy madaot. Samtang gihulagway ni Castillano nga mas maayo kung dunay video footage nga makasuporta isip ebidensya inubanan  sa ilang mga  affidavit.

Sumala pang Castillano kinahanglang personal nga mosang-at og reklamo ang kandidato batok sa mga tawong ilang gipasanginlang namalit og botos diha sa ilang buhatan o ba kaha diretso sa piskalya.

Lakip usab sa nadawat nga mga problema mao ang pagpakaon, paghatud og sakyanan ug pagpahigayon og party sa mga batan-on nga ang uban gipangita na sa ginikanan tungod kay wala na kauli.

“Kanang ingon ana ba nga bati kaayo 15-17 anyos nagsugod na og buhat og binuang sa politika,” asoy pang Castillano.

Dunay mga leksyon nga nakat-unan ang Comelec sa milabay'ng piniliay nga gipanghinaot nilang makurihian sa sunod nga piniliay karong tuig 2010.

Samtang usa sab sa mga problema sa mga botante sa mga voting centers mao ang kawalay mga voters information centers nga kaniadto ang Cebu-Citizen’s Involvement and Maturation in People’s Empowerment and Liberation(C-CIMPEL) maoy milihok.

“We hope next election moabag namo ang C-CIMPEL kay ang problema namo dili sila visible walay mga voters information center matag polling center,” asoy pang Castillano.

Sumala pang Castillano, dunay gibana-banang kapin 2   milyones nga rehistradong botante ang lalawigan sa Sugbu, ug usa sa mga problemang nakita mao ang nangawagtang nga pangalan sa voters list ug didto pa balikon sa mga tawo sa Comelec kung hain na sila nabutang nga presinto.

Usa sa mga gitumbok nga hinungdan niini mao ang nadugang nga mga botante.

Nagtuo si Castillano nga human nila I-deputized ang Parish Pastor Council Responsible Voting (PPCRV) maapil na sad ana ang C-CIMPEL.