Ika-unom, pito nga puwesto nga konsehales sa SK sa Parian tabla

Wala pa masulbad ang ika-unom ug ikapito nga luna pagka-konsehal sa Sangguniang Kabataan kon SK diha sa barangay Parian ning dakbayan sa Sugbu human wala motunga ang mga sakop sa Barangay Board of Canvassers kon BBOC sa Cebu City North District Comelec Office kagahapon aron unta sila husayon pinaagi sa bunot-bunot.

Matud ni city election officer Attorney Marchel Sarno nga ang BBOC maoy mosulbad sa panagtabla sa unom ka mga kandidato pagka-SK councilor sa Parian.

Giklaro ni Sarno nga ang papel sa Comelec sa niaging Barangay ug SK elections mao lang ang pag-supervise sa piniliay.

Nasayran nga ang unom ka kandidato nga nagtabla sa ika-unom usab nga puwesto, nakakuha og tag-17 botos matag usa kanila.

Kini mao sila si Mark Sesante, Jollyjoie Serad, Rhaymond Ursal, Anthony Tedena, Bernard Mati, ug Christian Mati.

Sumala ni Sarno nga duha lang sa unom ka kandidato ang makalingkod sa SK Council samtang matangtang ang uban.

Nagkanayon si Sarno nga mahimong masulbad ang maong problema pinaagi sa bunot-bunot apan kinahanglang dunay presensya sa mga sakop sa BBOC.

Kini tungod kay ang BBOC maoy giingong moproklamar sa mga modaug human sa ipahigayong draw by lots.

Apan sa paghikay ning balita, way nitunga sa mga sakop sa BBOC ug posibleng sa sunod semana na kini masulbad, tungod kay way trabaho sugod karong adlawa.

Gipadayag ni Sarno nga duna pay pipila ka mga kandidato sa niaging Barangay ug SK elections nga susama og nasinati sa mga kandidato sa barangay Parian.

Apan kini giingong nasulbad ra pinaagi sa toss coin ug sa draw by lots uban sa presensya sa mga sakop sa BBOC.