Nangabuak ang bintana sa Inayagan Barangay Hall sa dakbayan sa Naga human kini labaya og granada sa wala pa mailhing tawo kagahapon sa kaadlawon.
Base sa pamahayag ni Supt. Renato Malazarte, hepe sa Naga Police station sa gihimong imbestigasyon sa iyang mga sakop nasayran nga mga alas 2:00 kagahapon sa kaadlawon usa ka motorsiklo mihunong sa maong dapit ug sa pipila ka gutlo kalit lamang milanog ang masipang buto.
Sa pagsusi sa mga residente sa maong dapit nasuta nga adunay dakong lungag sa dalan ug gibanabana nga lima ka metros ang gilay-on sa atubangan sa barangay hall sa Inayagan.
Sa pagresponde sa kapolisan ilang nakita ang usa ka safety lever sa usa ka granada hinungdan nga si Malazarte mipahiling gyud dayon kini ngadto sa mga sakop sa bomb disposal unit pinanguluhan ni SPO2 Ceferino Camacho.
Walay naigo sa maong insidente gawas lang sa nabuak nga bildo sa maong buhatan, apan si Sr.Supt. Carmelo Valmoria, director sa Cebu Provincial Police Office nagkanayon nga dili tuyo sa milabay ang makaigo og tawo ug wala pa usab matino ang motibo niini.
“We are trying to ascertain the motive but we see it that it was not intended to inflict injuries to people kay gilabay kaadlawon man nga wala nay mga tawo but we are still verifying the motive,” asoy pa niini.
Miklaro si Valmoria nga dili kini pagpanghadlok para sa umaabot nga Kalag-kalag apan wala usab kini mokomentaryo kun may kalambigitan ba kini sa milabay’ng eleksyon.
Sa padayong imbestigasyon sa kapolisan sa dakbayan sa Naga wala nila isalikway ang posibilidad nga usa kini ka kaso nga adunay kalambiggitan sa milabay’ng piniliay sa barangay ug SK diin init ang panagtigi sa mga kandidato sa Brgy. Inayagan. — Uban sa report ni Edwin Ian Melecio