Parawan tiyabaw sa iyang kapildehan

Gitumbok sa pilderong barangay kapitan sa Lorega-San Miguel  Fortunato Parawan ang mga druglord sa iyang barangay nga maoy mibubo og dakong kantidad nga salapi ngadto sa iyang kaatbang nga maoy nakapilde kaniya sa bag-o lang natapos nga barangay ug SK-election niadtong Lunes.

Gibutyag ni Parawan dihang na-interbiyu   nga gikan sa tag P500, P1,000 ngadto sa P1,500   ang pinalitay sa botos sa iyang kaatbang sa politika nga si Lorenzo Monsanto gikan pa sa besperas sa eleksyon niadtong Domingo ug hangtud na sa pagka Lunes atol sa pagpahigayon sa piniliay.

Matud ni Parawan nga kini wala pay labot sa gipahigayong negative voting diin dunay iyang mga supporters ang gipamayran og tag P1,000 bugti sa pagpatatak niini og indelible ink aron dili na makabotar.

Matud ni Parawan nga milihok gyud ang mga druglord sa iyang lugar nga iyang naligsan pinaagi sa pagpatuman sa balaod pinaagi sa paggukod sa mga ilegal nga operasyon niini hinungdan nga mibubo kini og dakong kantidad ngadto sa iyang kaatbang sa politika.

Hinuon giklaro niya nga wala siyay plano nga mosang-at og reklamo kabahin sa gihulagway niyang kwestyonableng  kadaugan sa iyang kaatbang tungod kay sa higayon nga ma-disqualify kini sa posesyon dili man siya kun dili ang numero-unong konsehal ang automatic nga mo-asumer pagka kapitan .