Mayor Martinez ‘nangharass’

Usa ka miyembro sa Para Legal team sa barangay ug SK Election sa kuwarto distrito niakusar ni Bogo City Mayor Celestino Junie Martinez Jr. nga ni-harass kaniya gawas sa voting center sa Cayang Elementary School sa barangay Cayang Bogo niadtong Lunes atol sa piniliay.

Si Thomas Ignacio Hermosilla, 43, residente sa barangay Agujo Daanbantayan mireport sa Bogo Police Station nga samtang siya diha  duol sa Cayang Elementary School niakusar kang  Mayor Celestino Martinez uban sa iyang mga kauban niduol kaniya dayong pangutana nganong naa siya sa maong dapit ug unsay iyang gibuhat.

“Nag-unsa man ka diri? Ug dili ka motubag kulatahon tika dire ug isud og sako, wa ba ka kahibaw nga bag-o pang gipatay ang kapitan dire? Basin ikaw ang isunod? Mao kini ang giasoy ni Hermosilla sa kapolisan sa Bogo nga naa sa blotter nga nakapahadlok og maayo kaniya ang gipamulong sa mayor.

Matud pang Hermosilla sa iyang report sa kapolisan nga nihilom nalang siya ug nibiya sa nahisgutang lugar human  sa komprontasyon sa mayor.

Hinuon ang hepe sa Bogo Police Station Chief Insp. Arturo Pacifico sa iyang espesyal report ngadto kang CPPO Director Sr. Supt Carmelo Valmoria, nagkanayon siya ug ang augmentation force sa Bogo nga gipangulohan ni Insp. Amadeo Pepito dali silang miadto sa barangay Cayang aron susihon ang maong report  human sila makadawat nga dunay commotion nga nitumaw sa maong lugar.

Sa ilang pag-abot ang mga nakasaksi nagkanayon nga dunay duha ka wala mailhing tawo nga nisulod sa Cayang barangay hall nianang pasado alas 9 sa buntag nga nakapaalarma pag-ayo sa mga residente sa nahisgutang dapit lakip na ang barangay kapitan nga si Alexander Estrella kinsa maoy nihulip sa puwesto pagka kapitan human gipusil patay  si Bienvinido Cañete ug magpapili usab si Estrella sa susamang posisyon niadtong Lunes.

Matud pa si Estrella diha sa barangay hall niadtong tungora nangutana sa pangan sa duha ka wala mailhing tawo ug unsay ilang tumong ug tuyo nganong mosulod sila sa barangay hall.

Gumikan niini ang duha ka wala mailhing tawo wala matug-an sa ilang pangan, si Estrella uban sa iyang mga supporters nireport sa maong insidente kang Junie Martinez.

Dugang pang Pacifico sa dihang naabot na ang mayor sa barangay hall gikomprontasi gilayon ang duha ka tawo ug  daw masuk-anon ug dayong pangutana kun unsay ilang tumong sa pag-anha.

Dugang imbestigasyon nga gihimo ni Insp. Pacifico sa mga saksi ang duha nailhan nga si Atty. Allan Talisaysay ug miyembro sa Integrated Bar of the Philippines samtang ang usa nailhan nga si Regie Maamo.

Dugang pa sa report ni Pacifico ngadto kang Valmoria ang komosyon nga nahitabo tungod sa mis-communication.

Matud pang Pacifico nga napakyas usab siya pagkuha sa side sa mayor labot sa maong hitabo tungod kay sa iyang pag-abot nibiya na ang mayor sa maong dapit.

Tungod niini giawhag ni Pacifico ang duha ka habig nga mo-file og reklamo aron mahusay.

Hinuon matud pang Pacifico nga sa iyang pag-abot sa police station nianang alas 10:15 sa buntag naabtan niya si Hermosilla ug  kini mireport labot sa maong hitabo tali nilang Junie Martinez.

Apan niingon si Pacifico sa pagresponde nila sa maong report wala na nila maabti pa ang duha ka tawo ug labaw pang wala niya makit-i si Hermosilla.

Gi-refer na hinuon sa kapolisan si Hermosilla ngadto sa Bogo Election Officer Jose Barriga aron mo-file og formal complaint sa buhatan sa Comelec.