Rapist gikonbikto

Gihukman sa korte nga mabilanggo sa tibuok kinabuhi ang akusado sa kasong pagpanglugos didto sa dakbayan sa Naga niadtong tuig 2001 dihang usa pa kini ka lungsod.

Ang sala ni Regional Trial Court RTC-branch 24 Judge Olegario Sarmiento subay sa gipakanaog niining desisyon mikonbikto kini sa kasong pagpanglugos sa akusado nga si Ireneo Gansan, hingkod ang panuigon, molupyo sa nahisgutang lugar.

Gawas sa silot pagka bilanggo sa tibuok kinabuhi gimanduan usab sa korte ang akusado nga mobayad og P50 mil  isip actual indemnity ngadto sa biktima ug laing P50 mil  isip moral damages.

Kini human mapamatud-i sa prosekusyon ang tanang mga alegasyon niini batok sa akusado may labot sa gihimong pagpanglugos niini batok sa 19 anyos nga dalagita nga molupyo ra usab sa nahisgutang dakbayan.

Wala lang itug-an ang pangalan sa biktima aron paglikay sa kauwawan sa pamilya ug bansagon niini.

Subay sa gipresentar nga ebidensya sa prosekusyon nahitabo ang pagpanglugos  niadtong Pebrero 26,  2001 dihang wala pa mahimong usa ka siyudad ang lungsod sa Naga.