Mga magtutudlo naningil na sa ilang honorarium

Naningil na sa ilang honorarium ang mga magtutudlo nga miserbisyo sa miaging Barangay ug SK elections.

Apan matud ni Emma Compra sa Cebu City Cash Division nga wala pa sila makadawat  og direktiba sa Comelec kun sila ba gihapon ang mohatag niini ngadto sa mga magtutudlo.

Matud ni Compra nga kun sila makadawat na  og kamanduan, ila gilayong ipriparar ang payroll alang sa pag-release sa honorarium.

Moabot sa 7, 281 ang niserbisyo sa niaging eleksyon sa siyudad sa Sugbu lakip na niini ang libuan ka mga magtutudlo nga nilangkob sa Board of Election Tellers (BET).

Kini gikan sa 1,116 ka presinto sa amihanan ug 1,311 ka presinto usab sa habagatang distrito sa dakbayan.

Miingon si Compra nga dili pa sila makapangayo  og lista sa mga magtutudlo nga nilangkob sa BET tungod kay wala pa silay nadawat nga pahibawo.

“Wala mi mangayo og lista sa mga magtutudlo tungod kay wala pa man usab mi kadawat og direktiba gikan sa Comelec nga kami ang muhatag sa honorarium,”suma ni Compra.

Bisan gani si Cebu City North district election officer  Marchel Sarno dili pa usab makasiguro kung kanus-a mahatag ang honorarium.

Nagkanayon si Sarno nga magpaabot lang sila sa kamanduan o notisya gikan sa ilang uluhang buhatan labot niini.

Tungod sa maong kalambuan, hanap pa ang kahigayunan nga mahatag ug madawat sa mga magtutudlo ang ilang honorarium sa musunod nga mga semana.

Ang mga sakop sa BET giingong makadawat  og P2 mil  ug P500 nga transportation allowance.

Apan suma ni Sarno nga kung ang mga magtutudlo nga nilangkob sa BET nihupot usab og presinto sa SK, kini makadawat usab og dugang P500.

Samtang ang mga magtutudlo nga naapil usab sa Barangay Board of Canvassers kon BBOC laing P500 usab ang mapuno sa ilang honorarium.