Kapitan nga nasublian gidakop

Usa ka kapitan nga nasublian sa piniliay niadtong Lunes ang gidakop uban ang duha niya ka anak ug laing silingan kagahapon una pa siya pormal nga madeklarar sa Comelec tungod sa warrant of arrest sa kasong murder.

Ang gidakop giilang si barangay Canlumampao kapitan Eduardo Alicaba, Sr. 54, kinsa naa na sa iyang ikaduhang termino pagkakapitan sa ilang dapit, si Alicaba gipasanginlang usa sa mipatay sa usa ka giilang si Murphy Balmori nga taga barangay Ilihan,Toledo City.

Gawas kang Alicaba gidakop usab ang iyang duha ka anak nga sila si Eduardo, Jr., tanod,  30 ug Nelson, 23 ug si Cecilio Sanchez, 33, pinasikad sa warrant of arrest nga giluwatan ni Toledo City RTC Branch 29 Presiding Judge Cesar Estrera.

Ang grupo nila ni Chief Insp. Rex Derilo, Chief Insp. Fermin Armendares ug Sr.Insp. Patrick Vaño sa Criminal Investigation and Detection Group-7 human makadawat og hangyo gikan sa pamilya sa namatay nga duna nay warrant of arrest ang mga suspek.

Si Victoriana Balmori, inahan sa namatay sa pakighinabi sa Banat News kagahapon nagkanayon nga nag-disko ang iyang anak diha sa lugar uban ang mga higala dihang nakakita og away ang grupo niini sa laing pundok niadtong Oktubre 1 sa kaadlawon sa 2005.

Giingong gitabangan og kulata si Balmori apan nakadagan sa balay sa iyang iyaan apan gikatahong giapas sa mga suspek ug pugsanong gidala sa pangangkon dad-on sa barangay hall.

Gikuyogan pa kini sa iyaan apan gikatahong pag-abot sa ngilit nga dapit kalit nga gikulata ug gipusil makadaghang higayon si Balmori ug namatay samtang ang iyaan niini midagan nalang pabalik sa ilaha.

Ang mga suspek napasakaan og kaso ngadto sa korte ug walay piyansang gimando ang korte alang sa ilang temporaryong kagawasan.

Si Kapitan Alicaba sa pakighinabi sa mga tigbalita kusganong mihimakak sa pasangil ug nangangkong wala siya diha sa pagkahitabo tungod kay siya og anak nga si Eduardo nidala sa iyang anak nga barangay tanod nga si Nestor ngadto sa Toledo District Hospital human kini dunggaba ni Balmori atol sa pag-ulang niini sa karambola.

“Nahibulong bitaw ko nganong pag-file nila sa kaso giapil ko, ang ako lang unta adto gipapangita tong gipatay aron dad-on sa barangay hall, unya wala ta kabalo nga dunay mga paryente namo nga nakadungog pagkahibalo sa nahitabo kang Nestor, siguro giambusan si Balmori didto sa ngitngit,” asoy pang Alicaba.

Hasta ang laing anak niini nga si Nelson mihimakak usab nga diha sa pagkahitabo kay bag-o pa kining minyo ug layo ang ilang gipuy-an diha sa dapit sa gidiskohan. Nangangkon usab si Sanchez nga gihilantan siya niadtong gabhiuna.

Apan ang partidos sa biktima kusganong mitumbok sa mga suspek tungod kay duna silay mga testigos hasta na ang iyaan sa namatay nga nakakita sa pagkahitabo.

Si Alicaba mipasangil nga gipolitika siya ug giduhig lang ang iyang pangalan tungod kay ang duha ka kaubanan ni Balmori nga magsuong sila si Ian ug Ryan Igloria  mga pag-umangkon sa iyang kaatbang sa politika niadto nga si Andres Plaresan gikasuhan man nila og frustrated murder tungod sa pagdunggab sa iyang anak.

Si Alicaba ug napulo ka mga kaubanan ug mga opisyales sa barangay gikasuhan sa inahan sa namatay ngadto sa buhatan sa Ombudsman for the Visayas apan silang upat lang maoy girekomendar nga pasakaan og kasong kriminal.