Katawhan giawhag sa DILG mobotar

Ang buhatan sa Department of Interior and Local Development (DILG) nag-awhag sa katawhan sa paggawas ug pagbotar karong adlawa  sa mga kandidato nga maoy mahimong mga bag-ong opisyal sa atong tagsa-tagsa ka mga barangay sa nasud.

Nunot sa maog pag-awhag sa katawhan alang sa pagbotar karong adlawa maoy gisugyot ang pipila ka mga sumbanan sa pagpili og tukmang kandidato nga maoy mahimong bag-ong barangay opisyal.

Ang pipila sa mga sumbanan sa DILG sa pagpili og kandidato nga opisyal sa barangay mao ang relihiyoso, service ug people oriented ug mapinanggaon sa atong kalikopan.

Samtang  ang  Dilaab Movement kinsa nanawagan usab sa katawhan sa pagbotar may gipagawas usab nga laser test alang sa pagpili sa mga kandidato sa barangay opisyal karong adlawa.

Si Fr.  Carmilo Diola nga maoy over-all coordinator sa Dilaab Foundation sa iyang pagpasabot miingon nga labing maayo gayod nga ang tanang botante magtamod og laser test sa ilang pagpili og kandidato  sa piniliay karong adlawa.

Ang masulod sa laser test mao nga ang kandidato  nga gipili walay tinagoang bahandi, wala malambigit sa ilegal nga druga, wala  makigsandurot sa kurakot nga opisyal sa gobiyerno, wala malambigit sa pagpamalit og boto ug uban pa.