Modaog sa Oktubre 29 sa Nobiyembre 30 kalingkod

Unya pa sa Nobiyembre 30 makalingkod sa ilang katungdanan ang mapiling mga kandidato sa Barangay ug SK elections karong adlawa.

Kini maoy gipahibawo ni Cebu City DILG director nga si Patricio  Gabuya, subay usab sa mga pangutana sa ubang bag-o nga mga kandidato nga nakasiguro nang modaug.

Matud ni Gabuya hatagan una og usa ka buwan nga lugway ang mga pildirong incumbent barangay officials, nga mo-turn over sa property, financial ug barangay records.

“Aron duna pay one month nga ma-turn-over bitaw ang barangay government ngadto sa new officials, pero kung ma-reelected, wa nay turn-over,” sumala pa ni Gabuya.

Lakip nga gipaabot nga mopahigayon ug turn over mao ang 27 ka mga third termer nga mga barangay kapitan sa dakbayan, ug si Day-as barangay captain Michael Ocleasa.

Si Ocleasa mahimo pa untang magpasubli sa katungdanan apan nasipyat pag-file sa iyang COC tungod kay ang iyang napirmahan alang man sa pagka-barangay konsehal.

Nagtuo hinuon si Gabuya nga gawas kang Ocleasa, mihimo na og inventory ang mga third termer nga mga barangay kapitan.

Kini human usab mopagawas og memorandum ang ilang ulohang buhatan niadtong niaging buwan nga gipadangat ngadto sa mga city ug municipal mayors.

Ang memorandum nanawagan sa mga mayor nga momando sa mga barangay kapitan paghimo og property, financial ug records inventories.

Kini ipa-turn over ngadto sa bag-ong mapili nga mga barangay kapitan sa dili pa o sa adlaw mismo sa paglingkod niini sa katungdanan.

Ang mga mayor dunay supervisory role sa kabarangayan ug gipaabot nga kini maoy musiguro nga dunay proper turn-over sa records, properties, equipment ug uban pa.

Matud ni Gabuya nga bukas ang ilang buhatan alang niadtong mga outgoing ug incoming barangay officials nga mangayo og katin-awan labot niini.