Dawaton ang pagbuot sa katawhan ug dili ipamugos ang ilang kaugalingon nga moserbisyo sa ilang barangay.
Kini maoy tambag ni Cebu City North District Election Officer Attorney Marchel Sarno sa mga kandidato atol sa dili na kapugngang Barangay ug SK elections karong adlawa.
Matud ni Sarno nga kinahanglang mabag-o na ang kinaiya sa mga kandidato ug kini angayang sugdan diha sa kabarangayan.
Gusto ni Sarno nga dili na makadungog sa naandang rason sa pildirong mga kandidato nga gitikasan hinungdan sila nangapildi.
“They should accept the will of the people, dili nila ipamugos ang ilang kaugalingon kay ang eleksyon duna man gyoy daug ug pildi.”suma ni Sarno.
Gipadayag ni Sarno nga lisod tikason ang piniliay sa barangay tungod kay ang iniphanay ug proklamasyon sa mga manana-ug anha ra sa mga tunghaan.
Dugang niini niingon si Sarno nga gawas sa mga watchers, ang mga tawo nga mosaksi sa eskutinyo mobantay usab sa mga boto sa gidapigan nilang mga kandidato.
Taliwala niini wa hinoon isalikway sa election officer ang posibilidad nga duna gihapoy kandidato nga mo-protesta sa ilang kontra, ilabina niadtong modaug sa eleksyon.
Apan suma ni Sarno nga kung andam lang mudawat sa ilang kapildihan ang ubang kandidato, wala nay protesta nga mahitabo.
Sa pikas bahin giawhag sa election officer ang mga botante sa dakbayan nga mosayo pagbotar sa eleksyon karong adlawa.
Sumala ni Sarno nga dili na angayang paabuton pa ang kahaponon una mobutar aron dili maabtan sa pagpanira sa mga presinto.
Nagkanayon ang election officer nga alas 7 pa lang sa buntag abli na ang mga polling place ug tapuson ang botasyon unyang alas 3 sa hapon.
Tambag ni Sarno sa mga botante nga mas maayong magdala og ballpen ingon man sa listahan sa butaran, alang sa kasayon ug kadali sa pagbutar niini.