Dispatser naka-reward

Tungod lang sa inosenteng impormasyon nga gihatag ngadto sa kapolisan usa ka dispatser ang nakadawat og P300, 000 human matinong ang tawong mahubog ug magpunay og panghambog nga siya nakapatay kaniadto nga iyang kauban usa diay ka wanted sa Mindanao.

Ang nadakpan ug duna diay patong nga reward sa ulo gikan sa Department of Interior and Local Government giilang si Alfredo Tabapa, Jr. 29, lumad nga taga Purok 1 sa barangay Paitan, Quezon sa Bukidnon.

Si Tabapa dugay na diay'ng nagtago  gikan sa balaod human kini makapatay sa ilang lugar pipila na ka tuig tungod sa panagbangi sa yuta.

Ang 31 anyos nga dispatser (ngalan gipugngan) miduol sa iyang higalang si Sr. Insp. Michael Bastes nga maoy deputy sa Criminal Investigation and Intelligence Branch aron makisusi sa background niini.

Gikatahong magpunay og panghambog si Tabapa matag kini mahubog nga duna siyay gipatay kaniadto sa Bukidnon ug gani nakadunggab na usab kini og laing dispatser diha sa barangay Labangon kaniadto.

Samtang usa sa namatikdan sa dispatser mao ang paghari-hari ni Tabapa diha sa ilang lugar nga daw buot kining mohawod sa ubang mga tawo ug magpunay og panghudlat.

Diha na mahibaw-i gikan kang Bastes nga dugay na diay'ng wanted si Tabapa sa Bukidnon ug nabutang kini sa ika-siyam nga most wanted sa Bukidnon ug may patong nga P300,000 alang sa pagkasikop niini.

Si Tabapa nadakpan niadtong Hunyo 14,2007 diha sa Plaza sa barangay Poblacion sa lungsod sa Naga sa hapon ug gipresentar sa buhatan ni Sr. Supt. Patrocinio Comendador.

Si Tabapa miangkon sa iyang salaod human madakpi pinasikad sa warrant of arrest nga giluwatan ni Acting Presiding Judge Branch 8 sa Malaybalay, Bukidnon tungod sa kasong murder ug walay piyansang gitagana alang sa iyang temporaryong kagawasan.

Si Bastes ug ang dispatser miadto sa Manila dili palang dugay ug niadtong milabay'ng Huwebes   miadto sa Camp Crame sa buhatan sa Directorate for Intelligence diin gitunol ang reward nga P300,000 nga ganti.

Ang dispatser kansang asawa tua pa sa Zamboanga ug dunay duha ka mga anak, nagplanong mopalit og gamay'ng luna ug balay dinhi sa Sugbu aron dinhi na hingpit nga manimuyo.