Gisugdan na paghatag kagahapong adlawa sa Cebu City Hall ug sa Cebu City Comelec Office ang mga non-accountable forms alang sa Barangay ug SK elections ugmang adlawa.
Ang mga kagamitan sa piniliay nga gipanghatag naglakip sa mga ballot boxes, padlock, book of voters, voters’ list, ug uban pa.
Matud ni Cebu City North District Election Officer Atty. Marchel Sarno ang distribution sa mga non-accountable forms magpadayon hangtud karong adlawa.
Samtang ang mga accountable forms sama sa official ballots, election returns, statement of votes, unya pang mga alas dos sa kaadlawon ipanghatag sa City Hall.
Matod ni Sarno nga hapsay ang unang adlaw pagpang-distribute sa mga election paraphernalia tungod usab sa bag-ong sistema nga ilang gipatuman.
Sama usab unya niini kahapsay ang napanglantawan ni Sarno sa pagpang-apod-apod sa mga accountable forms unyang kaadlawon.
Gipadayag ni Sarno nga ang kuwang na lang mao ang paghatag sa honorarium alang sa mga magtutudlo nga moserbisyo sa eleksyon.
Nasayran sa Banat News nga ang matag magtutudlo makadawat og tag dos mil pesos nga honorarium sa Barangay ug SK elections.
Apan niingon si Sarno nga dugang P500 ang madawat sa mga magtutudlo alang niadtong mohupot usab og presinto alang sa SK.
Gawas niini niingon si Sarno nga mapun-an usab ug laing P500 ang honorarium sa mga magtutudlo nga molangkob sa Barangay Board of Canvassers kon BBOC.
Nagkanayon si Sarno nga posibling madugangan pa ang madawat nga honorarium sa mga magtutudlo kung maaprubahan sa ABC sa siyudad ang gisaad niini.
Sumala pa ni Sarno nga ang ABC nipasalig paghatag og dugang tag-usa ka libo ka pesos sa honorarium sa mga magtutudlo.