Usa ka 61 anyos nga barangay tanod sa Ermita ang nadunggaban sa iyang asawang giingong nagselos human siya masakping nakig-estorya og laing babaye diha sa barangay outpost duol sa Freedom Park sa Carbon Market sa nahisgutang barangay kagahapon sa kaadlawon.
Ang nadunggaban giilang si Pablo Tampus, 61, residente sa nahisgutang barangay samtang ang nakadunggab kaniya mao ang iyang asawang si Norma, 57.
Sa imbestigasyon sa Homicide Section, ang biktima mitug-an nga kasamtangang nakig-estoryahay siya sa iyang higalang babaye diha sa outpost dihang miabot ang iyang asawa.
Ang suspek gikatahong daling midunggab sa likod ni Tampus duha ka higayon ug nagdaling miikyas samtang gitabang ang biktima ug gidala sa Cebu City Medical Center.
Wala pa matino sa kapolisan kung mosang-at og kaso ang biktima batok sa iyang asawa.