Pasangil ni Ocarol binata – Bitang

Gikataw-an lang ang binata nga pasangil ni Kapitan Romeo Ocarol sa barangay Pasil, dakbayan sa Sugbu  sa higpit niyang kaatbang sa iyang pagpasubli sa katungdanan nga si Konsehal Mario Bitang sa barangay election.

Si  Ocarol sa iyang gipadayag sa Banat News miingon nga nasuya lang si Konsehal Bitang sa programa nga iyang gipatuman nga barangay water refilling  station nga maayo na kaayo ang ilang kita human kini niya gipaayo.

Sa iyang reaksiyon, si Bitang  sa dihang nahinabi sa Banat News  miingon  nga duha sila si Konsehal Ronnie Abejo nga misang-at og reklamong kalapasan sa Anti-Graft and Corrupt Practices Act  ngadto sa Ombudsman Visayas.

Dugang pa niya nga ang tumong sa ilang pagduso og reklamo sa Ombudsman mao ang pagpangita sa ilang kitang salapi sa barangay water refilling  station nga ilang gibanabana nga mokabat na sa  P8 milyones sukad sa tuig 2000 hangtod sa 2006.

Gibase nila sa taho sa Commission on Audit (COA) nga ang salapi sa ilang barangay wala magtamod sa tukmang pamaagi sa paggasto ug ang ilang  barangay  water  refilling station wala usab mogamit og opisyal nga resibo sanglit wala kini makakuha og mga rekisito isip legal nga negosyo.

Matud pa ni  Bitang nga daghan ang gibati og kabalaka nga magpadayon nga mawad-an og proyekto ang ilang dapit sanglit gikontrahan man  si Ocarol nila ni Mayor Tomas Osmeña ug Kongresista Antonio Cuenco tungod sa gihimong pagluib sa miaging Mayo 14 nga piniliay.

Giklaro ni  Bitang nga isip multi-awarded nga photo journalist sa Sugbu maoy iyang gibarogan ang pagpadayon sa ligdong nga panerbisyo nga  kabalak-ang mawad-an niini kun masublian si   Ocarol sa laing termino.

Giklaro ni Bitang nga dili mahimong mokompetensiya ang iyang negosyong tubig ngadto sa barangay water refilling station tungod kay mas mahal ang presyo sa iyang tubig ikomparar sa tubig sa barangay.

Gipasabot niya nga  mas mahal ang iyang tubig tungod kay legal man ang pagpadagan niini.

Si Bitang mitataw nga ang iyang water refilling station maoy nahimong legal niyang panginabuhian ikomparar ni Ocarol nga walay panginabuhian, gawas sa iyang pagka-opisyal sa barangay.

Kahinumduman, si Ocarol nagkanayon nga nasuya lang si Bitang sa refilling station sa barangay tungod kay mikompetensiya kini sa iyang negosyong tubig.

Laing mga isyu nga buot ni Bitang nga tubagon ni Ocarol mao ang pagkahanaw sa kalas sa bola ug landing fee, abang sa sports complex gikan sa derby nga gilusad ni Ocarol mismo, ug ang pagkawala sa share sa halin sa botica sa barangay ug sa rooftop sa barangay.