Mediaman nga kandidato mipasalig og kalamboan sa Barangay Malubog

Kausaban ug kalambuan sa barangay Malubog maoy tumong ni Vernilo “Bernie” Cabusao pagpapili pagka-kapitan sa nahisgutang barangay atol sa eleksyon karong Lunes.

Si Cabusao maoy  anchorman ug News head sa DYHP-RMN Cebu ug molupyo sa Barangay Malubog sulod na sa pipila ka tuig.

Nagtoo si Cabusao nga isip usa ka magsisibya, siya dako og matabang pagpalambo sa Malubog kung mahatagan og kahigayunan pagserbisyo sa ilang barangay.

“Sa ako man gong tan-aw, nabiyaan na ang Malubog sa ubang bukirang barangay sa dakbayan sa Sugbu in terms of development. Taud-taud na kong nagpuyo diri sa among barangay pero wa gyod ma-feel namong mga mulopyo nga dunay kausaban ang Malubog,” matud pa ni Cabusao.

Ang kandidato pagkakapitan sa Malubog maoy nagdala sa programang “Serbisyo Publiko sa DYHP-RMN Cebu”  matag hapon nga motabang sa mga tawo nga dunay problema.

Dili hinoon malalis ang pangangkon ni Cabusao tungod kay kini gidasunan usab sa station manager sa DYHP nga si Attorney Ruphil Bañoc.

“Sa taud-taud na nakong pagtrabaho sa media, daghan na man sab ta og contact, mahimo nato ning maduol ug makatabang sa panginahanglan sa barangay,” suma ni Cabusao.

Alang kang Cabusao, mahimo siya nga motabang alang sa kaayuhan sa ilang dapit, apan giingong mas daghan siya og mahimo kung dunay mandato gikan sa katawhan.

Giangkon hinuon ni Cabusao nga nag-atubang og kalisdanan ang iyang kandidatura tungod kay incumbent official ang iyang kontra.

Gawas niini, kaalyado usab ni Mayor Tomas Osmeña ang kasamtangan nilang barangay kapitan nga iyang giatbangan sa subli niining pagpapili.

Apan nagtoo si Cabusao nga sama kaniya, nangita usab og  kausaban ug kalambuan ang kadaghanan kun dili man ang tanang mga molupyo sa Malubog.

Kini maoy nakapadasig ni Cabusao sa pagpangampanya uban usab sa paghangop sa mga molupyo sa matag sitio sa Malubog nga iyang giduaw.