Ang incumbent nga kapitan sa Barangay Lagtang Celiapo “Semi” Cabuenas mitataw nga wala siya mabalaka sa mga isyu nga gilabay sa iyang kaatbang batok kaniya.
Ang nahisgutang kapitan gipasanginlan sa mga tigsuporta sa iyang kaatbang nga dili makit-an diha sa barangay hall.
Duol na ang eleksiyon sa barangay ug Sangguniang Kabataan ug ang mga kandidato nagbinatoay na kini og mga isyu.
Si Cabuenas kinsa nahimong kapitan sa barangay sukad niadtong tuig 2002, sa pakighinabi niini sa Banat News kagahapon mibutyag nga usahay sa buntag kundili sa hapon lang siya motungha sa barangay hall apan wala kini magpasabot nga wala siya makapahigayon sa iyang mga gimbuhaton isip lider sa barangay.
Matud ni Cabuenas nga wala sa local code nga ang kapitan mopundo sa barangay hall gikan sa alas 8:00 sa buntag ngadto sa alas 5:00 sa hapon.
Ang trabaho sa executive mao ang pag-execute, desisyon ug pagdumala sa iyang barangay ni Cabuenas pa.
Si Cabuenas nagkanayon nga kasagaran sa mga lumulupyo sa iyang barangay kinsa nanginahanglan og tabang moderetso lang kini og anha sa ilang balay.
Ang kapitan midungag nga sobra sa 24 ka oras ang iyang pagpahigayon sa serbisyo ug wala siya matandog sa mga isyu nga gilabay sa iyang kaatbang batok kaniya.