Usa ang patay ug usa ang naangol sa tulo ka mga lalaki human pusila sa usa ka tawo nga gidudahang sakop sa Tau Gamma Phi samtang paingon nang mamauli ang mga biktima sakay sa motorsiklo gikan namilit og mga campaign posters.
Nahitabo kini sa miaging gabii pasado alas 11 diha sa Palmere Drive, Poblacion Compostela, Cebu.
Si James Oros, 23, nga taga Poblacion nakabsan kagahapon sa kaadlawon sulod sa Vicente Sotto Memorial Medical Center sa dakbayan sa Sugbu human makaangkon og samad pinusilan sa liog samtang padayon pang giatiman sa mga doctor ang laing biktima nga si Justine Harvey Mecaros, 24, human maigo sa ibabaw’ng bahin sa bukobuko dihang milapos ang bala gikan kang Oros.
Ang gitumbok nga suspetsado kinsa nadakpan sa kapolisan sa hot pursuit operation giila nga si Jumbo Pumar, 24, nga taga Poblacion sa maong lungsod apan nihimakak nga siya maoy nipusil sa mga biktima.
Segun sa report nga naabot sa Cebu Provincial Police Office ang duha ka biktima uban kang Lee Marvin Mecaros, 16, namilit og campaign posters sa mga poste sa kuryente diha sa nahisgutang lugar kinsa ang uyoan nilang Lee Marvin ug Justine Harvey Mecaros nga usa ka incumbent barangay konsehal sa Poblacion nga si Manuel Mecaros magpasubli pag-usab karung umaabot Oktubre 29 sa susamang posisyon.
Si Cebu Provincial Police Office Director Sr. Supt Carmelo Valmoria atol sa press conference kagahapon nitug-an sa mga tigbalita ug nisalikway sa kalambigitan sa politika ang maong pagpamusil kundili fraternity related tungod kay ang suspek usa ka sakop sa fraternity.
Samtang padung na unta silang mamauli sakay sa usa ka motorsiklo nga gimaneho ni Lee Marvin Mecaros, si Oros nag-angkas dapit sa tumoy sa motorsiklo samtang si Justine Harvey diha sa tunga-tunga.
Apan sa ilang pag-abot sa nahitaboan kalit lang silang gipamusil sa suspek sanglit niadtong tungora nagbarug daplin sa karsada.
Unang naigo si Oros sa liog ug nilapos ang bala didto sa bukobuko ni Justine Harvey Mecaros.
Ang duha daling gihatud sa nahisgutang tambalanan apan kagahapon sa kaadlawon nakabsan sa kinabuhi si Oros.
Matud pang SPO4 Florencio Balila base sa mga impormasyon nga ilang nakuha ang biktima usa ka sakop sa Akrho samtang ang suspek sakop sa Tau Gamma Phi.
Sumala pang Balila nga dako ang posibilidad nga away sa fraternity ang hinungdan kay dugay nang nagkabikil si Oros ug ang suspek ug gipakagamay lang niini ang kalambigitan sa politika hinuon wala usab nila isalikway ang maong posibilidad.
Kagahapong adlawa gidala na ang suspek sa crime laboratory sa CCPO aron ipailawom sa paraffin test samtang giandam na sa kapolisan ang kasong murder ug frustrated murder batok kaniya .