Sayop ni Ocleasa ipasusi

Si ABC President Eugenio “Jingjing” Faelnar mopa-imbestigar sa mga opisyal sa  barangay Day-as nga gituhoang nalambigit sa pagmaniobra sa certificate of candidacy (COC) ni Kapitan Michael Ocleasa  nga nakasang-at sa pagka-konsehal  imbes pagka-kapitan.

Si Faelnar nga nahinabi sa Banat News nagkanayon nga gikinahanglan nga manubag ang mga responsable niini human usab si   Ocleasa mipadayag nga gisabotahe sa taga oposisyon  ingon man pipila niya ka staff nga dunay nahibaloan dihang iyang gibilin ang porma sa COC sa lamesa nga giilisan.

Sumala pa niini nga nasubo gyud siya sa gidangatan sa iyang kaubang kapitan hinungdan nga mohimo siyag lakang niini sa ABC aron patubagon kadtong mga nalambigit nga kawani sa barangay Day-as.

Iyang gipasabot nga walay luna sa paghupot og puwesto sa barangay o sa goberno ang  misabotahe sa kandidatura ni Ocleasa.

Dugang pa niini nga gikinahanglan gyud nga matangtang sa ilang serbisyo ang maong mga responsable gumikan kay lisod kaayo kining maong mga klase sa tawo nga makahupot og katungdanan.

Si Konsehal Suzette Quijano, usa sa higpit nga karibal ni Ocleasa pagka-kapitan, mihangop sa laraw ni Faelnar.

Matud ni Quijano nga walay laing mabasol sa pagkasayop sa COC ni Ocleasa kun dili ang iyang kaugalingon tungod kay wala kini magtan-aw sa iyang gipirmahan ug gisumiter didto sa Comelec.

“Wala tay laing ma-blame except sa iyang kaugalingon. Gi-double check unta niya ang form nga iyang gi-fill-apan,” si Quijano nagkanayon, kinsa miingon nga sa panahon pa sa iyang termino nga mopirma lamang kini sa mga resolusyon nga sayop-sayop ang grammar.

Sumala pa ni Quijano nga naluoy siya karon sa grupo ni Ocleasa tungod kay nahimo na silang walo ka kandidato pagkakonsehal, apan wala nay kandidato pagka-kapitan.

Ang Commission on Election nagdumili na paghatag og higayon ni Ocleasa nga ma-usab ang iyang COC.

Matud pa ni election officer Lionel Marco Castillano nga responsibilidad sa usa ka kandidato ang pagtan-aw sa iyang gisulat sa porma.

Si Castillano nagkanayon nga kun dili makabantay sa iyang gisulat sa COC ang usa ka kandidato, unsa na kaha unya kun mahimo na kining opisyal kun makadaog sa eleksiyon.