Konseho sa Lapulapu misaway sa binuhatan ni Pelaez

Ang konseho sa dakbayan sa Lapulapu mipasar og resolusyon pagpadayag sa sentimento sa mga lumolupyo sa maong dakbayan batok sa giingong pag-apil-apil ug paglawgaw sa politikanhong kagawasan ug integridad sa dakbayan.

Sa resolusyon nga gipangamahan nilang Konsehal Eduardo Cuizon ug Florito Pozon, gisaway sa konseho sa dakbayan ang mga binuhatan sa negosyanteng si Efrain Pelaez Jr.

Gisaway usab sa konseho ang pag-apil-apil sa Philippine Export Processing Zone Authority ug pagbabag niini aron ang kagamhanan sa dakbayan sa Lapulapu mapakyas sa gimbuhaton niini subay sa Local Government Code of 1991.

Gidayeg sa mga konsehal pinaagi sa Resolution No. 284-2007 si Mayor Arturo Radaza, City Administrator Teodulo Ybañez, City Atttorney Vincent Joseph Lim sa pagpatuman sa balaod ug ordinansa bisan sa mga hulga ug pagsamoksamok sa nagkadaiyang sektor.

Ang konseho midayeg usab sa mga residente sa Lapulapu, department heads, sa kapolisan ug mga barangay tanod nga miabag sa pagpatuman sa closure order sa Marina Mall.

Sumala pa sa maong resolusyon nga si Pelaez nagsugod lamang sa pagbayad sa iyang mga buhis sa dakbayan ubos na sa administrasyon ni Radaza.

Matud pa niini nga ang kanhi mayor nga si Ernest Weigel nasota nga usa sa mga investor sa Coralpoint Properties Inc. nga gidumala ni Pelaez nga na-isyuhan gyud og certificate of stock.

Giinsister sa konseho nga ang tanang service establishments sulod sa ecozones ug kadtong nag-okupar sa mga luna sa PEZA nga dili “export-oriented” kinahanglang mobayad gyud og national ug local taxes.

Ang Bureau of Local Government Finance (BLGF) sa sulat-tubag niini pinetsahan og Marso 12, 2007, sa sulat sa kagamhanan sa dakbayan sa Lapulapu pagpangayo sa ilang opinyon, misuporta sa baruganan sa dakbayan nga nagkinahanglan ang maong mga establisamento og business permit ug pagbayad og buhis sa ngadto sa dakbayan.

Ang kagamhanan sa dakbayan naninguha nga makakolekta og buhis sa mga service establishments sulod sa ecozones sukad niadtong 2006 ug pakuhaon og mayor’s permit ang mga locators sa Mactan Export Processing Zone, apan kanunay’ng babagan sa tagdumala sa MEPZ Authority.

Ang resolusyon gipadala ngadto ni Pres. Gloria Arroyo, Interior Sec. Ronaldo Puno, PNP chief Avelino Razon, Deputy Ombudsman for the Visayas Pelagio Apostol, Gobernador Gwendolyn Garcia, mga bokal Victor Maambong ug Wenceslao Gakit, ug regional police chief Ronald Roderos.