Deklarasyon sa Comelec gisaway

Wala mahimuot si Kapitan Felicisimo “Imok” Rupinta sa Barangay Ermita ning dakbayan sa Sugbu human migawas sa balitang gibutang sa area of concern ang iyang barangay subay sa nagsingabot nga piniliay.

Si Rupinta nga nahinabi sa Banat News mipadayag nga nipadangat gyud siyag reklamo diha sa buhatan sa Comelec labot ning maong balita tungod kay dili siya makatoo nga hot spots ang iyang barangay.

Sumala pa niini nga malinawon ang iyang barangay bisan paman kun tulo sila nga  magtigi sa pagka kapitan sukwahi sa nigawas nga assessment sa kapulisan nga gipagawas sa Comelec tungod kay hangtud ning mga panahuna walay mga kagubot gumikan kay pulos lang sila mga sakop sa BOPK ug kun aduna man gani subsob nga kampanya sa ila lang mga konsehales.

Iyang giklaro nga ni-kwestyon siya sa buhatan sa Comelec kagahapon kini aron sa pagpangayog husay kun unsay gibasihan niini tungod kay dili siya makatugot nga madaot ang imahen sa ilang barangay.

Matud pa niini nga tataw kaayong nasayop ang kapulisan sa pagduso sa maong desisyon hinungdan nga dili siya makatugot nga magpadayong mabutang sa hot spots ang ilang lugar hangtud sa election ug gikinahanglang malibkas kini.

Samtang subay niini sa iyang bahin sa Kapitan Mary Ann Delos Santos nga nahinabi sa Banat News mipadayag nga para kaniya dili na siya mokwestyon pa niini.

Sumala pa niini nga iya hinoong gikalipay ang pagdeklarar sa Comelec nga apil sa “hot spots” ang iyang barangay tungod kay iyang gipaniguro nga kun ugaling aduna may mga kagubot dili kini gikan sa iyang grupo kun dili sa ilang mga kaatbang sa pulitika.

Dugang pa niini nga nakita siguro sa kapulisan nga init kaayo ang mga dumadapig ni Mayor Tomas Osmeña, hinungdan nga gibutang sila sa area of concern karong barangay election.

Apan si Sr.Supt. Patrocinio Comendador sa pakighinabi sa mga tigbalita kagahapon nagkanayon nga iya unang susihon ang nigawas nga balita sanglit walay bisan usa ka barangay sa dakbayan nga iyang gibutang sa maong kategorya.

Sa parameters kon sukdanan sa Comelec pagdeklarar sa lugar nga election area of concern, matud pang Comendador kinahanglang dunay presensya sa mga armadong goons, ikaduha, kinahanglang duna nay bayolenteng panghitabo sa maong dapit atol sa eleksyon, ikatulo, init kaayo ang panag-atbang sa mga kandidato.

Samtang kung dunay presensya sa mga armadong rebelde gawas sa tulo ka nahisgutang sukdanan, mabutang na kini sa election areas of immediate concern.

Ang Lahug, Ermita ug Pasil sumala pang Comendador init ra kaayong panag-atbang sa mga kandidato ang naa  maong dili kini masulod sa maong kategorya.

Sa pagkakaron ang maong tulo ka barangay lakip na ang barangay Guadalupe gibutang sa CCPO nga kinahanglan lang og security monitoring.