Gipanghimakak ni SPO2 Honorato Tano sa kapolisan sa dakbayan sa Lapulapu nga mihatag siya og kasayuran sa mga tigbalita bahin kang Warlito Toledo alyas Waway nga taga sitio Banaba, barangay Guinsay, dakbayan sa Danao.
Sa gipadangat nga sulat ni SPO2 Tano sa Banat News iyang gipanghimakak nga nakaluwat usab siyag kamandoan sa iyang mga kauban alang sa dinaliang pagdakop kang Waway.
Matud pa ni SPO2 Tano nga nahingangha kaayo siya dihang migawas ang balita nga nagtumbok kaniya nga maoy tinubdan sa maong taho.
Giklaro ni SPO2 Tano nga dili mahitabong mohatag og susamang impormasyon tungod kay wala kini basehanan.
Ang maong balita nakapaukay sa mga residente sa kalungsuran sa amihanan lakip na sa dakbayan sa Lapulapu, apan ang kapolisan sa matag nahisgotang mga lungsod daan nang misalikway sa maong taho.
Dunay mga poster ug litrato ni Waway nga gipangtapot sa pipila ka mga barangay sa Danao City nga namasangil nga siya rapist ug serial killer.
Apan pipila ka mga tinubdan ang nagduda hinuon nga posibleng dunay tawong nasuko kaniya ug buot lang kining dauton.