Mohimo og linaing subsub nga imbestigasyon ang Bureau of Immigration and Deportation (BID-7) batok sa mga kawani niini nga gipasanginlang nangilkil sa usa ka Korean ug nadakpan sa gipahigayong entrapment operation sa National Bureau of Investigation niadtong Lunes.
Gibutyag ni Atty. Leobarlo Enad, ang OIC Director sa BID-7, dihang nahinabi sa Banat News nga gitugyan nila sa ulohang buhatan sa BID ang paghimo og linaing imbistigasyon aron gyud pagsiguro nga walay white wash nga mahitabo ilabina kay kauban nila sa buhatan ang mga hingtungdan niini.
Nasayran nga bugtong si Dilausan Sarit Montor, ang immigration intelligence operative officer, ang regular nga sakop sa BID samtang pulos kontrakwal ang laing tulo ka civilian confidential agent nga sila si Daniel Gumba, Mabert Impas ug Alfredo Suico.
Ang maong mga kawani nasikop sa entrapment operation sa NBI human nangilkil og P500 mil nga salapi ngadto sa usa ka Korean nga si Lee Don Bum.
Matud ni Enad mahimong maputol ug dili na ma-renew ang kontrata sa maong mga kaswal nga civilian agent kun mapamatud-an nga kini positibo sa maong aligasyon.