Padaganon na lang ni Mayor Tomas Osmeña pagka-konsehal sa barangay Day-as si Kapitan Michael Ocleasa human kini masipyat pagpirma og certificate of candidacy (COC) nga iyang giduso sa Commission on Election.
Si Ocleasa magpasubli unta pagka-kapitan, apan COC sa pagka-konsehal ang iyang gipirmahan ug giduso sa Comelec.
Matud ni Osmeña nga iya nang nahinabi si Ocleasa sa maong problema ug miuyon na kini nga mag-konsehal na lang sa ilang barangay.
Gipaabot nga mag-atubang og kalisdanan ang kapitan sa iyang kandidatura tungod kay pagka-kapitan ang gipangampanya atol sa pagsugod sa campaign period niadtong miaging semana.
Si Election Officer for the North Marchel Sarno ang nakadiskobre nga sayop ang COC nga naduso ni Ocleasa.
Sa iyang pagkasayod sa sayop, si Ocleasa mipahibalo nga mosang-at og petisyon sa korte aron tugotan siya nga makausab sa sayop sa iyang COC aron makadagan gyud kini pagka-kapitan sa Day-as.
Human gikunsulta ni Ocleasa ang maong problema sa iyang abogado nga si Atty. Julius Caesar Entice, padayon kining nangampanya pagka-kapitan.
Ang SK chairperson sa Day-as, Rafonzel Quijano, nga gipasuspenso kaniadto ni Ocleasa sa katungdanan nalooy sa gidangatan karon sa ilang kapitan.
“I feel sorry for him nga nasayop siya, I went to Comelec to look at it, mao gyud pagka-konsehal ang iyang napirmahan,” matud ni Quijano.
Sa pikas bahin, nanawagan si Rafonzel ngadto sa mga tigpaluyo ni Ocleasa nga ang iyang inahan na lang nga magpapili usab pagka-kapitan mao nay suportahan.
“So sa iyang mga supporters, I hope nga ila na lang suportahan ang akong mama sa pagka-kapitan,” dugang pamahayag ni Quijano kinsa kandidata usab pagka-konsehal sa Day-as sa line-up sa iyang inahan nga si Suzette Quijano.
Nasayran nga dunay tulo o upat ka grupo sa mga kandidato diha sa Day-as nga pulos niangkong mga dumadapig sa BOPK, ug usa na niini ang grupo ni Quijano.
Apan matud ni Mayor Osmeña nga wa siyay partikular nga kandidato nga iindosar hulip kang Ocleasa pagka-kapitan, tungod kay giingong illegal ang maong lakang.