Subling nanawagan sa publiko si Comelec regional Director Atty, Rey Rene Buac nga moduso kinig affidavit diha sa ilang buhatan batok niadtong mga kandidato kinsa nakalapas sa lagda sa Comelec nga gipatuman sa barangay election.
Si Buac miangkon nga daghan kaayog gi-atubang nga mga importanteng gimbuhaton ang Comelec matag adlaw ug dili na sila makahimo sa pag-monitor niadtong mga kandidato nga mopataka lang og papilit sa ilang mga campaign materials ug uban pa.
Matud pa niini nga ang mga ebidensiya nga ilang gikinahanglan labot sa mga kalapasan sa kampaniya usa ka pinermahan nga affidavit ug barogan sa usa ka tawo nga nakakita o kaha nakakuha'g hulagway ingon man footages sa mga kalapasan aron mosalir ang kaso.
Gitataw ni Buac nga ang publiko maoy daling makahibalo sa mga kalapasan sa mga kandidato hinungdan nga kun gusto nila nga mahimoan kini'g aksiyon sa Comelec gikinahanglan nga ilang barogan ang mga pasangil ug dili mahadlok sa pagreklamo labi na sa mga pasangil nga pagpamalit og boto.
Iyang gipasabot nga sila kulang gyud kaayo’g tawo nga makalibot sa mga kabarangayan hinungdan nga iyang gipanghinaot nga ang publiko mohimo usab sa ilang abag alang na sa limpiyo ug hapsay nga pinili-ay.
Si Buac midungag nga dili mamahimo nga igo lang motawag sa ilang buhatan o kaha mopasangil nga walay igong basehan ug gikinahanglan gyud ang insaktong ebidensiya sa ingon dili usab madaot ang ilang buhatan kun adunay moreklamong kandidato sa ilang pagahimoong imbestigasyon.