Daghang isla mawala: Atienza

Gikonpirmar ni Sec. Jose Atienza Jr. sa Department of Environment and Natural Resources (DENR) nga pipila ka tuig gikan karon daghang mga isla sa Pilipinas ang mawagtang ug muonlod ilawom sa dagat.

Si Atienza nga miatubang sa taga media sa usa ka press conference sa Marco Polo Hotel nagkanayon nga inig-abot sa maong higayon dili tiaw ang kadaot nga mahiagoman sa kinabuhi sa katawhan ug kabtangan sa nasud.

Gitumbok niya nga ang bugtong hinungdan niini mao ang pagsaka sa giladmon sa dagat gumikan sa dakong kausaban sa klima sa kalibutan nga moresulta sa “global warming” kun kainit sa kalibutan.

Sa hilabihang kainit mahilis ang mga bungtod sa ice sa north pole lakip ang lawod sa ice sa kadagatan nga maoy makadugang sa giladmon sa dagat sa tibuok kalibotan.

Kini matud pa ni Atienza maoy molubong sa daghang isla sa nasud ngadto sa ilawom sa dagat ug wala nay tawo nga makapugong pa niini.

Matud pa ni Atienza nga ang nasud nga may kapin sa 7,000 ka isla dinhi sa sidlakan, makabato’g kausaban ang iyang kasaysayan pinaagi sa pagtibhang na unya sa gidaghanon sa iyang mga pulo.

Si Atienza nga gibati’g kabalaka nagkanayon nga dili tiaw unya kadaghan ang kinabuhi nga makalas ug kadaot sa kabtangan sa higayong moabot na ang maong katalagman.

Gibutyag ni Atienza nga sa maong higayon walay laing mabasol kun dili ang mga nasud sa gawas sama sa Estados Unidos sa America, China, India, Japan ug tanang nasud sa Uropa kansang ekonomiya gipadagan pinaagi sa mga higanteng industriya nga nagbuga og polusyon.