Patigayon wa ilista sa PEZA pabayron ni Tomas

Pasirad-an ni Mayor Tomas Osmeña ang mga balay patigayon nga anaa sa I.T. Park nga dili PEZA-Registered Economic Zone Enterprises.

Kini kun dili mobayad og buhis sa kagamhanan sa dakbayan sukad sa pagsugod sa ilang operasyon.

Ang I.T. park rehistrado sa Philippine Economic Zone Authority kon PEZA, ug ang mga business establishment niini exempted gikan sa LGU permit, local taxes ug ubang balayranan.

Apan matud ni Osmeña nga ang gihatagan og exemption sa maong mga bayranan mao lang kadtong mga exporter nga anaa sa I.T. park.

Kini gipahimug-atan sa park administrator nga si Engr. Raul Mananquil human masayod nga ang ubang business establishment dili rehistrado sa PEZA.

Gitataw ni Mananquil nga ang exempted sa buluhisan mao lang kadtong PEZA-registered enterprises ug dunay PEZA Certificates ug Registration Agreement.

Subay niini gimanduan ni Mananquil ang mga tenants sa I.T. Park nga dili PEZA-Registered pagtuman sa mga rekisitos nga gilatid sa kagamhanan sa dakbayan.

Hinuon miingon si  Osmeña nga iyang hatagan og igong higayon ang nahisgutang mga business establishment pagtuman sa mga requirements.

Partikular nga gitumbok sa mayor nga palukaton og business permit sa City Hall  mao ang mga coffee shop, kan-anan, ug uban pa.

Subling gipadayag ni Osmeña nga siya dili magduha-duha pagpasira sa nahisgutang mga balay patigayon kun magdumili pagbayad og buhis sa siyudad.