Hayag kaayo ang posibilidad nga pamolitika ang lakang ni Mayor Jonas Cortes sa dakbayan sa Mandaue kinsa mipadayag nga mapadayon ang housing project diha sa Sitio Paradise, Barangay Looc, matud ni Bise Mayor Carlo Fortuna.
Si Fortuna kinsa nahinabi sa Banat News mipasangil nga dili malilong ang posibilidad nga namolitika na usab ang mayor labot sa housing project kini tungod kay kasagaran sa mga beneficiary ang dugay nang nagpaabot nga matukod ang maong proyekto niadto sa pamunoan ni kanhi Mayor Thadeo Ouano.
Matud ni Fortuna nga ang lihok sa mayor tataw nga pamolitika tungod kay nag-atras abante na usab ang desisyon niini gumikan kay sa paglingkod niini sa posisyon gisalikway ni Cortes ang nahisgutang proyekto sa pagtuo nga adunay mga kalapasan sa mga structural designed sa building ingon man sa pagtuo nga daku kaayo ang P100 milyon pesos nga magasto niini.
Ang Bise Mayor mipasabot nga angayang bantayan sa katawhan ang desisyon sa mayor kini tungod kay dili usab kalikayan nga inig human sa election karong 29 sa Oktubre posibleng usbon na usab ang desisyon ug dili na ipadayon ang pagtukod sa proyekto.
Si Fortuna mibutyag nga sila sa konseho naglantaw kun unsay sunod nga lakang sa mayor ug unya na sila mohimog lakang kun dili na maki-angayon ang desisyon niini.
Ang konseho sa dakbayan sa Mandaue pabor nga mapadayon ang proyekto.
Hinoon gipadayag ni Fortuna nga bisan pa og mapadayon og pabarog ang proyekto molungtad pa og pipila ka buwan ang proseso niini tungod kay ang mayor mipadayag nga usbon ang desinyo sa istraktura nga usa ka building nga unom ka andana ngadto na sa duha ka mga building nga adunay 208 units.
Ang makalangay mao ang Memorandum of Agreement (MOA) nga ilang gikasabutan sa National Housing Authority nga mogahin og 100 million sa orihinal nga desinyo hinungdan nga hayan usbon ang maong kasabotan nga ipaagi og balik sa konseho.
Gitaho nga niadtong miaging adlaw si Cortes mipahibawo nga iya nang ipadayon ang proyekto ug gipasalig niini ngadto sa mga urban-poor nga dili sila mabug-atan sa ilang balayranan matag buwan.