Boluntaryong mitahan kagahapon sa buntag sa iyang kaugalingon ngadto sa mga opisyal sa sitio Camp 6, Barangay Manipis ang usa ka 30-anyos nga lalaki nga suspetsado sa pagpatay diha sa maong lugar.
Si Eddie Traya, ulitawo, residente sa maong barangay mibutyag kagahapon sa buntag sa Banat News nga ang iyang inahan ang mitambag kaniya nga mohunong na sa pagtagotago ug motahan sa iyang kaugalingon ngadto sa mga polis.
Sila si Filomon Jabasa ug Amado Anoble nga mga kagawad sa nahisgutang barangay mitahan ni Traya diha sa kapolisan sa dakbayan.
Si Traya higala sa magsuong Glenn ug Benjie Barceloña kinsa mga suspetsado usab sa pagpatay ni Guillermo Juarez, ulitawo, hingkod ang panuigon nga taga dakbayan sa Toledo.
Si Juarez uyab sa minor de edad nga igsuon nila ni Glenn ug Benjie.
Gikataho nga si Benjie ug Glenn walay gusto nga makigrelasyon ang ilang manghod ngadto ni Juarez nga maoy hinungdan sa insidente.
Ang insidente sa pagpatay nahitabo niadtong Septiyembre 22 kinsa si Juarez gikulata ug gipusil sa magsuong Barceloña ug human sa maong hitabo gikataho nga si Traya miayuda ni Glenn sa pagtukmod ni Juarez ngadto sa bung-aw nga gituohang maoy hinungdan sa kamatayon sa biktima.
Si Traya kinsa nadetiner karon sa Talisay police detention cell mihimakak sa mga pasangil batok kaniya ug nagkanayon kini nga si Glenn ang mipusil ni Juarez.
Ang suspetsado midungag nga dihang miabot ang mga polis human sa hitabo nagtago lang siya diha sulod sa ilang balay tungod kay gibati siya og kahadlok.