Nangindahay karon si Konsehal Arsenio Pacaña nga mapadali ang pagpasar sa Cheap Medicine Bill.
Alang sa konsehal nga mas nindot kun mahingpit nang balaod ang nahisgutang proposal sa dili pa ang panahon sa pasko.
Matud ni Pacaña usa ka maayong gasa sa mga Pilipino ang maong balaodnon kung kini maaprobahan sa dili pa ang holiday season break sa mga magbabalaod.
Tungod niini, usa ka resolusyon ang ipalabang sa konsehal atol sa sesyon sa City Council karong Miyerkules nga mag-awhag sa kongreso pagpadali sa approval.
“There is a constant public clamor for government to come up with measures to bring down the prices of medicines, considering that many of our less fortunate brother Filipinos could barely afford to buy life-saving medicines,” nagkanayon ang resolusyon ni Pacaña.
Gikataho nga ang presyo sa mga midisina sa nasud, makapila pil-a ang kamahal niini sa presyo sa mga tambal sa ubang kanasuran sa Asya sama sa India, Pakistan, Thailand ug uban pa.
Gipadayag sa konsehal nga taliwala sa napasar nga Generic Drugs Act mga 20 ka tuig na ang nakalabay, apan giingong wa mamatikdi sa mga Pilipino ang pag-ubos sa presyo sa mga medisina.
Naglaum si Pacaña nga sa Senate Bill No. 1658 kon ang Cheap Medicine Bill, mapahimuslan na sa mga Pilipino ang baratong mga tambal.
Nasayran sa Banat News nga ang nahisgutang balaodnon nga gipanday ni Senador Mar Roxas, naaprobahan na sa ikaduhang pagbasa.
Nalatid sa maong balaodnon ang pag-angkat og baratong mga tambal ngadto sa gawas sa nasud ug paghatag og insentibo ug uban pa ngadto sa mga importer niini.
Ang pagpalabang sa Cheap Medicine Bill gi-certify na ni Pres. Gloria Macapagal Arroyo nga urgent kon dinalian.
Tungod niini, nanghinaot si Pacaña nga hatagan kini og prayoridad sa mga magbabalaod aron mapahimuslan gilayon sa kabus nga mga Pilipino.