Mokabat sa P3 milyones ang danyos sa sunog nga miugdaw sa usa ka construction firm didto sa Tagonol, Cogon, dakbayan sa Sugbu kagahapon sa kaadlawon.
Ang naugdaw mao ang Budget Builders, Inc nga gipanag-iya ni Esperanza Lumacang nga namaligya og mga construction materials.
Base sa imbestigasyon nga gihimo ni SFO1 Felix Romero sa kabomberohan sa dakbayan sa Sugbu nasuta nga kuryente ang hinungdan sa maong pag-ulbo sa kalayo gumikan kay didto nagsugod sa outlet sa ilang production area nga nagsiga base sa nakita sa duty security guard nga si Andres Rosales.
Gumikan niini, dali nga mikatap ang maong kalayo sa palibot sa maong buhatan tungod usab sa mga pintal ug uban pang kemikal nga baligya sa maong tindahan.
Hinuon atol sa maong sunog walay gikatahong nasamdan ug napaso ug gibanabana nga mokabat sa P3 milyones ang danyos niini.
Matud pa ni Lumacang nga kaduha na mahitabo ang maong sunog apan sa unang higayon kini nadali ra sa ilang mga tawo ang pagpalong sa kalayo, apan karon gumikan kay nahitabo kini kaadlawon ug ang security lang ang diha sa maong edipisyo hinungdan nga wala na gyud kini matabang.
Nadawat sa kabomberohan ang alarma mga 4:42 kagahapon sa kaadlawon ug gipaubos kini sa 3rd alarm ug nakontrolar sulod sa 48 minutos.
Ang maong kompaniya adunay 150 kapin nga trabahante nga nawad-an og trabaho gumikan sa maong trahedya.