Si Bise Mayor Carlo Fortuna sa dakbayan sa Mandaue mipasidaan sa iyang mga kaalyadong kandidato sa barangay nga dili mohimo’g kampaniya nga “below the belt” batok sa ilang mga kaatbang sa pagka-kapitan, konsehal ug SK karong nagsugod na ang kampaniya sa barangay election.
Si Fortuna mipasabot nga iyang gipadangat ang maong mensahe ngadto sa iyang kaalyado sa barangay nga mohimo’g kampanya nga tinarong sama sa paghan-ay sa mga plata porma de gobiyerno diha sa barangay nga makita sa katawhan.
Suma pa niini nga ang mga barangay maoy usa ka gamay'ng unit sa nasud apan kini maoy pinakalig-ong haligi sa pagpili og mga opisyal sa nasud hinungdan nga magsugod sa mga kabarangayan ang maayong paagi sa kampanya.
Iyang giklaro nga gidid-an niya ang ilang mga kaalyado nga molabay og mga hugaw nga isyu ngadto sa ilang mga kaatbang kini aron ang mga tinuoray nga programa sa kabarangayan maoy ilang ipatuman sa ingon mamahimong magmalinawon ug limpiyo ang barangay election diha sa ilang dakbayan.
Si Fortuna nagkanayon nga dili sila gusto ug motugot nga mohimog mga dirty tactics gumikan kay dili kini makatabang sa mga gikinahanglan sa mga barangay nga molambo ug mapalig-on ang pagpatuman unya sa mga basic services ingon man malikay usab sa hugaw nga politika ang barangay.
Gipanghinaot sa bise mayor nga ang mga kaatbang usab sa ilang mga kaalyado dili mohimog dirty tactics gumikan kay ang pinili-ay sa barangay non-partisan kini ug angayan nga silang mga kandidato sa barangay mopakita sa ilang political maturity panahon sa piniliay.