Dili tinuod nga usa ka “serial killer” si Warlito Toledo alyas Waway nga gikagubtan karon sa lungsod sa Liloan ug Compostela ug sa mga siyudad sa Danao ug Lapulapu, sumala pa ni Cebu Provincial Police Office Sr. Supt. Carmelo Valmoria.
Tungod niini, si Valmoria miawhag sa publiko nga dili angayang mabalaka ug magpabiling kalmado kun makadungog sa report kalabot ni Waway.
Si Valmoria nagkanayon nga base sa rekord nga nakuha gikan sa dakbayan sa Danao, kasong rape lamang ni Waway niadtong 2003 ang nalutsan og warrant of arrest ug adunay report usab nga nalambigit kini sa laing frustrated murder.
Hinuon padayon pa silang nag-verify sa ubang kaso ni Waway.
Nanghinaot si Valmoria nga ang katawhan sa lalawigan sa Sugbu dili maalarma sa report kalabot ni Waway, ilabi na ang mga residente sa Liloan, Compostela ug Danao.
Sumala pa niya nga ang estorya kabahin ni Waway walay kamatuoran ug bunga lamang sa mga tabi-tabi nga manganak og daghang interpretasyon.
Gipasalig ni Valmoria nga kontrolado sa kapolisan ang lihok ni Waway tungod kay usa kini ka wanted nga tawo.
Si Valmoria miingon nga naninguha karon ang kapolisan sa Danao nga madakpan dayon si Waway.
Gi-tap ni Valmoria ang tanang opisyal sa kapolisan sa probinsiya, apil na ang mga barangay tanod ug mga anti-crime volunteers, ilabi na sa bukirang bahin sa Danao ug mga silingang lungsod.
Miabag usab ang 78th Infantry Battalion sa Philippine Army sa pagpangita kang Waway, matud ni Valmoria.
Sumala pa sa hepe sa CPPO nga kinahanglang madali ang pagsikop ni Waway aron dili mapahimuslan sa ubang mga grupo o indibidwal nga criminal ang higayon sa gikatahong modus operandi ni Waway.
Unang nataho nga si Waway manuktok sa kabalayan ug ang mangabli iyang patyon ug ang mga babaye iyang lugoson. Kun dili mangabli ang tagbalay, iyang lud-an ang mga tsinelas.
Lakip ang mga lumolupyo sa Lapulapu nahadlok usab ni Waway.