Nagpunsisok kagahapong adlawa ang mga kandidato kinsa misang-at sa ilang Certificate of Candidacy (COC) diha sa mga buhatan sa Comelec niining siyudad.
Lakip sa nisang-at sa iyang COC kagahapon mao si kanhi Cebu City Councilor Eugenio Gabuya Jr. kinsa magpapili pagka-kapitan sa barangay Cogon-Pardo.
Wa usab magpabintaha ang ubang mga sakop sa Media nga miitsa sa ilang kawo sa politika ug miduso sa ilang tagsa-tagsa ka mga COC kagahapon.
Kini sama nila ni Bernie Cabusao nga magpapili pagka-baraangay kapitan sa Malubog, ug Tantan Sabalones Jr., pagka-konsehal sa barangay Pasil.
Si Cabusao maoy usa sa mga banggiitang anchorman ug news head sa DYHP-RMN CEBU, samtang si Sabalones maoy sinaligang imbestigador sa nahisgutang sibyaanan.
Kapin na sa usa ka libo ka mga kandidato sa south district ang nakasang-at sa ilang mga COC kagahapong adlawa.
Samtang mokabat usab sa usa ka libo ka mga kandidato sa north district ang nakaduso sa ilang tagsa-tagsa ka COC ngadto sa Comelec.
Wa pay labot niini ang gatosan ka mga kandidato sa duha ka distrito nga miduso usab sa ilang mga COC alang sa SK elections.
Karong adlawa, gipaabot nga maghuot ang duha ka buhatan sa Comelec sa siyudad, tungod kay deadline na sa pagsang-at sa mga COC.
Lakip sa gipaabot nga moduso sa iyang COC mao ang kanhi konsehal sa dakbayan nga si George Rama, kinsa magpapili pagka-kapitan sa barangay Basak San Nicolas.
Ang duha ka election officer sa dakbayan nga sila si Attorney Marchel Sarno ug Attorney Edwin Cadungog, subling nanawagan niadtong magpapili sa umaabot nga eleksiyon.
Buot sa duha ka election officer nga mosang-at og sayo sa ilang mga COC karong adlawa ang tanang mokandidato aron malikayan ang posibleng problema nga motumaw.