Deadline sa filing karon; andam na ang Comelec

Gipangandaman na karun sa Commission on Election Comelec-7 ang pagpatuman og mga pamaagi aron malikayan ang posibling paghuot sa mga kandidatu nga moduso sa ilang Certificate of Candidacy (COC) atol sa deadline sa filling karong alas 12:00 sa tungang gabii.

Si Comelec-7 director Rene Rey Buac miawhag sa mga kandidato nga mosayo ug dili magpalawom nang gabii pagsang-at sa ilang COC aron malikayan ang paghuot sa mga buhatan sa Comelec dinhi sa rehiyon.

Gipasabot ni Buac nga mas peligro usab alang sa mga kandidato kun i-atol sa deadline ang ilang pagduso sa kandidatura tungod kay lawom na kining gabii ug peligro nga makasugat unya kini og problema ilabi na kun dunay kuwang ang mga iduso niining dokumento tungod kay wala nay panahon pag-asikaso niini.

Hinuon giklaro ni Buac nga gipangandaman na nila ang posibling paghuot sa mga kandidato sa mga lainlaing buhatan sa Comelec sa kalungsoran ug gipahibalo niini nga kadto lang mga kandidato nga makasulod na sa buhatan sa Comelec sa dayon nang alas 12:00 sa tungang gabii ang atimanon ug patiwason pagduso sa ilang COC’s.

Samtang kadtong mga kandidato nga magpabilin nga anaa sa gawas sa buhatan sa Comelec atol sa pagtak-op sa tungang gabii  dili na dawaton ang iduso niining mga COC.

Nunot niini subling gipahinumduman ni Buac ang tanang kandidatu sa pagsugod sa campaign period ugmang adlawa nga sundon ang mga lagda sa Comelec aron dili masugal sa peligro ang kandidatura niini.

Sentro sa gitumbok ni Buac mao ang paggasto lang og P3  sa mga kandidato sa matag botante sa ilang barangay ug ingon man dili pasobrahan ang gidak-on sa mga posters niini ug ibutang sa hustong lugar.