Tun-an pa sa Cebu City Prosecutors Office ang motion for reconsideration nga giduso sa Department of Social Welfare and Development (DSWD) aron irekonsiderar ang pagbasura sa kasong acts of lasciviousness batok kang Fr. Benjamen Ejares nga gipasanginlang nimolestiya sa mga tinun-an sa Abellana National School atol sa gipahigayong Life in the Spirit Seminar sa maong tunghaan sa milabay’ng tuig.
Si Cebu City Prosecutor Nicolas Sellon gitakdang moumol og panel nga maoy tahasan paghupot alang sa himuon nga subling pagtuon sa kasong gipasaka batok sa pari nga gibasura na sa piskaliya.
Giangkon sa fiscal nga nagkinahanglan pa sila og taastaas nga higayon aron resolbahon ang motion for reconsideration nga giduso nila ni Konsehal Gerardo og Atty. Alvin Butch Cañares.
Apil sa resolbahon sa piskaliya ang gisukip nga motion for inhibition batok nila ni fiscal Alexander Acosta ug fiscal Fernando Gubalani paghupot sa maong kaso.
Ang piskaliya mibasura sa maong kaso sa pari human gihulagway niini nga napakyas ang prosekusyon pagpresentar og mga balidong ebidensya nga maglambigit sa pari sa maong kaso human gihulagway niini nga usa ka relihiyoso ang kalihukan tali sa mga tinun-an sa Abellana National School diin mitumaw ang maong pasangil og dili angay’ng hatagan og malisya.